राष्ट्रीय माहिती विज्ञान केंद्रात ३७६ जागांसाठी भरती; पदवीधरांना सरकारी नोकरीची संधी

सरकारी नोकरीच्या शोधात असलेल्या उमेदवारांसाठी महत्त्वाची बातमी आहे. राष्ट्रीय माहिती विज्ञान केंद्रात (NIC) एकूण ३७६ पदांसाठी भरती प्रक्रिया राबविण्यात येत आहे. या भरतीअंतर्गत सायंटिफिक/टेक्निकल असिस्टंट-A या पदांसाठी उमेदवारांकडून ऑनलाइन अर्ज मागविण्यात आले आहेत. इच्छुक आणि पात्र उमेदवारांना ३० सप्टेंबर २०२६ रोजी सायंकाळी ५.३० वाजेपर्यंत अर्ज करता येणार आहे.

३७६ पदांवर भरती

या भरतीमध्ये सायंटिफिक/टेक्निकल असिस्टंट-A पदासाठी एकूण ३७६ जागा उपलब्ध आहेत. त्यामध्ये कॉम्प्युटर सायन्सेस अँड IT साठी ३००, इलेक्ट्रॉनिक्स अँड कम्युनिकेशनसाठी २६ आणि डेटा सायन्स अँड AI साठी ५० पदे आहेत.

शैक्षणिक पात्रता काय?

या पदांसाठी उमेदवाराने संबंधित विषयामध्ये M.Sc./MS/MCA/B.E./B.Tech. केलेले असणे आवश्यक आहे. इलेक्ट्रॉनिक्स, इलेक्ट्रॉनिक्स अँड कम्युनिकेशन, इलेक्ट्रॉनिक्स अँड टेलिकम्युनिकेशन, कॉम्प्युटर सायन्सेस, कॉम्प्युटर अँड नेटवर्किंग सिक्युरिटी, सॉफ्टवेअर सिस्टिम, इन्फॉर्मेशन टेक्नॉलॉजी आणि इन्फॉर्मेटिक्स यांसारख्या विषयांचा समावेश आहे.

याशिवाय उमेदवाराकडे GATE 2024, GATE 2025 किंवा GATE 2026 पात्रता असणे आवश्यक आहे.

वयोमर्यादा

३० सप्टेंबर २०२६ रोजी उमेदवाराचे वय १८ ते ३० वर्षांच्या दरम्यान असावे. अनुसूचित जाती आणि जमातीच्या उमेदवारांना वयामध्ये ५ वर्षांची, तर इतर मागासवर्गीय (OBC) उमेदवारांना ३ वर्षांची सवलत देण्यात आली आहे.

अर्ज शुल्क किती?

सामान्य, OBC आणि EWS प्रवर्गातील उमेदवारांसाठी ८०० रुपये अर्ज शुल्क आहे. तर SC, ST, दिव्यांग आणि महिला उमेदवारांना अर्ज शुल्कातून सूट देण्यात आली आहे.

संपूर्ण भारतात नोकरीची संधी

या भरतीतील निवड झालेल्या उमेदवारांना संपूर्ण भारतात नोकरीची संधी मिळणार आहे. अर्ज प्रक्रिया ऑनलाइन पद्धतीने पार पडणार आहे.

महत्त्वाच्या तारखा

ऑनलाइन अर्जाची अंतिम तारीख : ३० सप्टेंबर २०२६

अर्ज करण्याची वेळ : सायंकाळी ५.३० वाजेपर्यंत

कागदपत्र पडताळणी : नंतर कळविण्यात येईल

त्यामुळे पात्र उमेदवारांनी अंतिम मुदतीची वाट न पाहता आवश्यक कागदपत्रांची तयारी करून ३० सप्टेंबरपूर्वी ऑनलाइन अर्ज करावा.