अट्रावल मारहाण प्रकरणाला नवा ट्विस्ट! फरार निलंबित पोलीस शिपायाचे अखेर आत्मसमर्पण

यावल । यावल तालुक्यातील अट्रावल येथे महिला आणि तिच्या मुलीला मारहाण केल्याप्रकरणी गुन्हा दाखल झाल्यानंतर फरार असलेला निलंबित पोलीस शिपाई अनिल तायडे अखेर पोलिसांच्या हाती लागला आहे. उच्च न्यायालयाने त्याचा जामीन अर्ज फेटाळल्यानंतर त्याने रविवारी (२३ ऑगस्ट) यावल पोलीस ठाण्यात स्वतः हजर होत आत्मसमर्पण केले. पोलिसांनी त्याला तात्काळ अटक केली असून, पुढील कायदेशीर प्रक्रिया सुरू आहे.

ग्रामसभा सदस्यत्वाच्या वादातून वाद विकोपाला

अट्रावल येथे २८ मार्च २०२६ रोजी ही घटना घडली होती. फिर्यादी विजया तायडे (६०) आणि आरोपी अनिल तायडे हे नातेवाईक असून, अनिल तायडे यांच्या पत्नीचा आणि विजया तायडे यांचा ग्रामसभा सदस्यत्वावरून जुना वाद होता. याच वादातून घटनेच्या दिवशी दोन्ही बाजूंमध्ये वाद झाला.

यावेळी विजया तायडे यांना शिवीगाळ करून त्यांच्यासोबत मारहाण करण्यात आल्याचा आरोप आहे. आईला वाचवण्यासाठी मध्ये पडलेल्या त्यांच्या मुलीला, आरतीलाही मारहाण करण्यात आली. या प्रकारात आरतीच्या डोक्याला लोखंडी रॉडने गंभीर दुखापत झाल्याचे पोलिसांकडे दाखल तक्रारीत नमूद करण्यात आले आहे. या प्रकरणी यावल पोलीस ठाण्यात अनिल तायडे याच्यासह सागर तायडे आणि माया तायडे यांच्याविरुद्ध भारतीय न्याय संहितेच्या संबंधित कलमांनुसार गुन्हा नोंदविण्यात आला.

पाच महिन्यांपासून फरार

गुन्हा दाखल झाल्यानंतर अनिल तायडे अटकेच्या भीतीने फरार होता. पोलिसांनी तपास पूर्ण करून ३० जुलै रोजी अन्य आरोपींविरुद्ध दोषारोपपत्र दाखल केले. अनिल तायडे अटक झाल्यानंतर त्याच्याविरुद्ध पूरक दोषारोपपत्र दाखल केले जाणार असल्याचे तपासात नमूद करण्यात आले होते. दरम्यान, अटकेपासून बचाव करण्यासाठी अनिल तायडे याने उच्च न्यायालयात जामिनासाठी अर्ज केला. मात्र, २३ ऑगस्ट रोजी न्यायालयाने त्याचा जामीन अर्ज फेटाळून लावला. न्यायालयाच्या निर्णयानंतर अखेर त्याने यावल पोलीस ठाण्यात हजर होण्याचा निर्णय घेतला.

पोलिसांनी केली अटक

अनिल तायडे याने पोलीस ठाण्यात आत्मसमर्पण करताच यावल पोलिसांनी त्याला अटक केली. आता त्याच्याविरुद्ध BNSS कलम १९३ नुसार पूरक दोषारोपपत्र दाखल करण्याची प्रक्रिया केली जाणार आहे.मारहाण प्रकरणाची गंभीर दखल घेत पोलीस विभागाने अनिल तायडे याच्यावर विभागीय कारवाई केली होती. ३१ मार्च रोजी त्याला निलंबित करण्यात आले होते. त्यानंतर प्राथमिक चौकशी सुरू करण्यात आली आणि २८ जून रोजी चौकशीचा अहवाल सादर करण्यात आला.

चौकशीच्या अहवालानंतर २१ ऑगस्ट रोजी त्याची दोन वर्षांची वेतनवाढ रोखण्याचा आदेश देण्यात आला. याबाबतची माहिती जळगावचे पोलीस अधीक्षक श्रीकांत धिवरे यांनी दिली.हायकोर्टाचा जामीन नाकारल्यानंतर अखेर फरार पोलीस शिपायाला पोलिसांसमोर हजर व्हावे लागले असून, आता या प्रकरणातील पुढील कायदेशीर कारवाईकडे लक्ष लागले आहे.