चाळीसगाव : छत्रपती संभाजीनगरहून सुरतकडे निघालेल्या एसटी बसचा चाळीसगाव तालुक्यातील कन्नड घाटात आज सकाळी थरारक अपघात झाला. घाटातून बस जात असताना अचानक स्टेअरिंग रॉड जॅम होऊन तुटल्याने चालकाचे बसवरील नियंत्रण सुटले. काही क्षणांतच बस रस्त्याच्या कडेला असलेल्या संरक्षक कठड्याकडे गेली आणि कठड्याला अडकून थांबली.
बस दरीच्या दिशेने जाण्याची शक्यता निर्माण झाल्याने प्रवाशांमध्ये मोठी घबराट पसरली. अपघाताच्या वेळी बसमध्ये ५९ प्रवासी होते. बस कठड्याला अडकल्यानंतर काही प्रवाशांनी घाबरून खिडक्यांमधून बाहेर पडण्याचा प्रयत्न केला. मात्र, बस सुरक्षितपणे थांबल्याने सर्व प्रवाशांना बाहेर काढण्यात यश आले.
या घटनेत चार प्रवासी किरकोळ जखमी झाले आहेत. जखमींना तातडीने जवळच्या रुग्णालयात उपचारासाठी दाखल करण्यात आले असून त्यांची प्रकृती स्थिर असल्याची माहिती आहे. सुदैवाने या दुर्घटनेत कोणतीही जीवितहानी झाली नाही.
घटनेची माहिती मिळताच पोलिसांसह स्थानिक नागरिक घटनास्थळी दाखल झाले. बचावकार्य राबवत बसमधील प्रवाशांना सुरक्षित बाहेर काढण्यात आले. काही वेळापूर्वी मृत्यूच्या छायेत गेलेला हा प्रसंग सुखरूप संपल्याने प्रवाशांनी सुटकेचा निःश्वास सोडला.
दरम्यान, या घटनेमुळे एसटी बसच्या तांत्रिक तपासणी आणि देखभालीचा प्रश्न पुन्हा चर्चेत आला आहे. प्रवास सुरू करण्यापूर्वी बसची स्टेअरिंग यंत्रणा तपासण्यात आली होती का, तसेच स्टेअरिंग रॉड अचानक जॅम होऊन तुटण्यामागे नेमके कारण काय, याचा तपास होणे गरजेचे आहे. सुदैवाने संरक्षक कठड्यामुळे बस दरीत कोसळली नाही आणि मोठा अनर्थ टळला.
Discussion about this post