जळगाव : केंद्र शासनाच्या प्रधानमंत्री इंटर्नशिप योजनेच्या तिसऱ्या फेरीअंतर्गत जळगाव जिल्ह्यातील पात्र उमेदवारांसाठी नामांकित कंपन्यांमध्ये ८ इंटर्नशिपच्या संधी उपलब्ध झाल्या आहेत. या संधीचा पात्र उमेदवारांनी लाभ घ्यावा, असे आवाहन जिल्हा कौशल्य विकास, रोजगार व उद्योजकता मार्गदर्शन केंद्रातर्फे करण्यात आले आहे.
या योजनेअंतर्गत उमेदवारांना ६ ते ९ महिन्यांसाठी इंटर्नशिप दिली जाणार असून, दरमहा ९ हजार रुपये विद्यावेतन मिळणार आहे. इंटर्नशिपसाठी रुजू झाल्यानंतर ६ हजार रुपयांचे अनुदानही दिले जाणार आहे.
दहावी पासपासून पदवीधरांना संधी
जळगाव जिल्ह्यात चोला मंडलम, एचडीएफसी बँक लिमिटेड आणि बजाज इन्शुरन्स लिमिटेड यांसारख्या नामांकित कंपन्यांमध्ये इंटर्नशिपच्या संधी उपलब्ध आहेत. यासाठी दहावी उत्तीर्ण, डिप्लोमा तसेच पदवीधर उमेदवार पात्र आहेत.
ऑनलाइन अर्ज कसा कराल?
योजनेचा लाभ घेण्यासाठी पात्र उमेदवारांनी pminternship.mca.gov.in या संकेतस्थळाला भेट देऊन नोंदणी करावी. अधिक माहितीसाठी जिल्हा कौशल्य विकास, रोजगार व उद्योजकता मार्गदर्शन केंद्र, जळगाव येथे ०२५७-२९५९७९० या क्रमांकावर संपर्क साधावा. तसेच शासकीय तांत्रिक विद्यालय परिसर, जी. एस. ग्राऊंडजवळ, जळगाव येथे प्रत्यक्ष भेट देता येईल. जिल्ह्यातील पात्र उमेदवारांनी प्रधानमंत्री इंटर्नशिप योजनेतील या संधीचा लाभ घ्यावा, असे आवाहन सहायक आयुक्त संदीप गायकवाड यांनी केले आहे.
Discussion about this post