जळगाव । एरंडोल तालुक्यातील आडगाव येथे १६ वर्षीय अल्पवयीन मुलीचा बालविवाह करून तिच्यावर लैंगिक अत्याचार केल्याचा धक्कादायक प्रकार समोर आला आहे. या बालविवाहानंतर अल्पवयीन मुलगी गर्भवती झाली आणि तिने धुळे येथील हिरे मेडिकल कॉलेजमध्ये ६ ऑगस्ट २०२६ रोजी नवजात बालकाला जन्म दिल्यानंतर हा प्रकार उघडकीस आला. या प्रकरणी कासोदा पोलिसांनी पती, सासरे, सासू आणि मुलीच्या वडिलांविरुद्ध बालविवाह प्रतिबंधक कायदा, पोक्सो आणि भारतीय न्याय संहितेअंतर्गत गुन्हा दाखल करून चौघांना अटक केली आहे.
पोलिसांनी दिलेल्या माहितीनुसार, आडगाव येथील १६ वर्षीय मुलीचा तिचे वय अल्पवयीन असल्याची माहिती असतानाही २० जून २०२५ रोजी कमलाकर रमेश भील (गायकवाड) याच्यासोबत विवाह लावून देण्यात आला. अल्पवयीन मुलीचा विवाह लावून देणे कायद्याने गुन्हा असतानाही हा विवाह करण्यात आल्याचे तपासात समोर आले आहे.
विवाहानंतर अल्पवयीन मुलगी गर्भवती राहिली. त्यानंतर ६ ऑगस्ट २०२६ रोजी धुळे येथील हिरे मेडिकल कॉलेजमध्ये तिची प्रसूती झाली. अल्पवयीन मुलीने बाळाला जन्म दिल्यानंतर वैद्यकीय तपासणीदरम्यान तिचे वय आणि विवाहाची माहिती समोर आली. त्यानंतर या प्रकरणाची माहिती पोलिसांना मिळाली.
चौघांविरुद्ध गंभीर कलमांन्वये गुन्हा
या प्रकरणी पोलीस उपनिरीक्षक शारदा गोकुळ भावसार यांच्या फिर्यादीवरून कासोदा पोलीस ठाण्यात गुन्हा क्रमांक १२६/२०२६ दाखल करण्यात आला आहे. आरोपींविरुद्ध भारतीय न्याय संहिता, पोक्सो कायदा आणि बालविवाह प्रतिबंधक अधिनियमातील विविध कलमांन्वये गुन्हा दाखल करण्यात आला आहे.
या प्रकरणात कमलाकर रमेश भील (गायकवाड) – पती, दिलीप देवचंद गोकुळ – मुलीचे वडील, रमेश कौतिक भील – सासरे आणि नबाबाई भील – सासू यांना आरोपी करण्यात आले आहे. कासोदा पोलिसांनी तपासाची चक्रे वेगाने फिरवतचारही आरोपींना अटक केली. सध्या चौघांची चौकशी सुरू असून, या प्रकरणातील इतर बाबींचा तपास पोलिसांकडून करण्यात येत आहे. या गंभीर प्रकरणाचा पुढील तपास सहाय्यक पोलीस निरीक्षक श्रीकांत अंकुश पाटील करीत आहेत.
Discussion about this post