जळगाव : जळगाव जिल्ह्यातील पारोळा तालुक्यातील शिवरे येथे ग्रामसभेदरम्यान शासकीय कर्तव्य बजावणाऱ्या ग्रामसेवकावर झालेल्या हल्ल्यात त्यांचा दुर्दैवी मृत्यू झाल्याची धक्कादायक घटना समोर आली आहे. जुन्या बिलांच्या मंजुरीवरून झालेल्या वादातून सात जणांनी ग्रामसेवकाला बेदम मारहाण केल्याचा आरोप आहे. या मारहाणीतून जीव वाचवण्यासाठी पळत असताना ग्रामसेवकाचा मृत्यू झाल्याच आरोप आहे
मृत ग्रामसेवकाचे नाव प्रल्हाद पाटील (वय ५२) असे आहे. ही घटना १७ ऑगस्ट रोजी शिवरे येथे घडली. या प्रकरणी पारोळा पोलिसांनी सात जणांविरुद्ध गुन्हा दाखल केला असून, एका संशयित मुख्य आरोपीला अटक करण्यात आली आहे. इतर आरोपींचा शोध सुरू आहे.
ग्रामसभेत वादाचे रूपांतर हाणामारीत
मिळालेल्या माहितीनुसार, शिवरे येथे ग्रामसभा सुरू असताना जुन्या बिलांना मंजुरी देण्याच्या मुद्द्यावरून प्रल्हाद पाटील यांच्यासोबत काही जणांचा वाद झाला. सुरुवातीला झालेल्या शाब्दिक वादाचे रूपांतर काही वेळातच हाणामारीत झाले.आरोपानुसार, सात जणांनी पाटील यांना घेरून शिवीगाळ करत मारहाण केली. या हल्ल्यातून स्वतःचा जीव वाचवण्यासाठी त्यांनी तेथून पळण्याचा प्रयत्न केला. मात्र, पळत असतानाच त्यांचा दुर्दैवी मृत्यू झाला.
घटनेची माहिती मिळताच पारोळा पोलीस ठाण्याचे पथक घटनास्थळी दाखल झाले. प्रकरणाचे गांभीर्य लक्षात घेऊन पोलिसांनी भारतीय न्याय संहितेच्या कलम १०५ अंतर्गत गुन्हा दाखल केला आहे.पोलिसांनी तपासाला वेग देत एका संशयित आरोपीला ताब्यात घेतले आहे. उर्वरित संशयित आरोपींचा शोध घेण्यासाठी पोलिसांकडून विविध ठिकाणी तपास सुरू आहे.
दरम्यान, मृत ग्रामसेवक प्रल्हाद पाटील यांच्या पार्थिवावर मंगळवारी (१८ ऑगस्ट) त्यांच्या मूळ गावी बोधर्दे (ता. पारोळा) येथे अंत्यसंस्कार करण्यात येत आहेत. या पार्श्वभूमीवर कोणताही अनुचित प्रकार घडू नये, तसेच कायदा-सुव्यवस्थेचा प्रश्न निर्माण होऊ नये यासाठी बोधर्दे आणि शिवरे परिसरात पोलिसांचा कडक बंदोबस्त तैनात करण्यात आला आहे.
शासकीय कर्तव्य बजावत असलेल्या ग्रामसेवकावर ग्रामसभेतच जीवघेणा हल्ला झाल्याने या घटनेने परिसरात संतापाचे वातावरण निर्माण झाले आहे. या प्रकरणातील सर्व आरोपींना तातडीने अटक करून कठोर कारवाई करण्याची मागणी होत आहे.
Discussion about this post