कुंभमेळा बनावट वर्कऑर्डर प्रकरणात जामनेरातील आणखी चौघांना अटक; संशयितांची संख्या सहावर

जामनेर/नाशिक । २०२७ मध्ये नाशिक-त्र्यंबकेश्वर येथे होणाऱ्या सिंहस्थ कुंभमेळ्याच्या कामांच्या नावाखाली बनावट कागदपत्रे आणि कार्यारंभ आदेश तयार करून कोट्यवधी रुपयांची फसवणूक केल्याप्रकरणी नाशिक पोलिसांनी तपासाची व्याप्ती वाढवली आहे. या प्रकरणात जळगाव जिल्ह्यातील जामनेर येथून आणखी चार संशयितांना अटक करण्यात आली आहे. त्यामुळे या प्रकरणातील अटक केलेल्या आरोपींची संख्या आता सहावर पोहोचली आहे.

कुंभमेळ्यासाठी राज्य सरकारकडून मोठ्या प्रमाणावर विकासकामे हाती घेण्यात आली आहेत. याच कामांचा फायदा घेऊन काही संशयितांनी निविदा प्रक्रिया न होताच विविध कामांच्या बनावट वर्कऑर्डर तयार केल्याचा आरोप आहे. या माध्यमातून तक्रारदाराची तब्बल ३ कोटी ५ लाख रुपयांची आर्थिक फसवणूक झाल्याचे तपासात समोर आले आहे.

या प्रकरणात नाशिक पोलिसांनी यापूर्वी जामनेर येथील तनय महाजन (३२) आणि नरेंद्र महाजन (५१) यांना अटक केली होती. त्यानंतर तपास पुढे नेत शोएब अहमद अब्दुल सत्तार शेख (३६), अब्दुल रईस अब्दुल मुनाफ शेख (४३), शकील अहमद सलीमुद्दीन शेख (४२) आणि मोहम्मद वसीम अब्दुल गफ्फार (४२) यांना वेगवेगळ्या दिवशी अटक करण्यात आली.

न्यायालयाने तनय महाजन, नरेंद्र महाजन, शोएब शेख आणि अब्दुल रईस शेख यांना १७ ऑगस्टपर्यंत पोलीस कोठडी सुनावली आहे. तर शकील शेख आणि मोहम्मद गफ्फार यांना शुक्रवारी रात्री अटक करण्यात आली.

५९१ कोटींच्या कामांचे बनावट आदेश?

पोलिसांच्या तपासानुसार, संशयितांनी कुठलीही अधिकृत निविदा प्रक्रिया नसताना तब्बल ५९१ कोटी रुपयांच्या विविध कामांचे बनावट कार्यारंभ आदेश तयार केल्याचा आरोप आहे. तक्रारदाराला कुंभमेळ्यातील हाऊसकीपिंग आणि इतर कामे मिळवून देण्याचे आमिष दाखवून त्याचा विश्वास संपादन करण्यात आला.या प्रकरणी नाशिकरोड पोलीस ठाण्यात तीन स्वतंत्र गुन्हे दाखल करण्यात आले आहेत.

राजमुद्रा, डिजिटल स्वाक्षरीचा गैरवापर

तपासादरम्यान संशयितांनी बनावट यादी, भारत सरकारच्या राजमुद्रेसह कागदपत्रे, डिजिटल स्वाक्षऱ्या तसेच नाशिक महानगरपालिकेच्या टेंडर नोटीसचा गैरवापर केल्याचे समोर आले आहे. या बनावट कागदपत्रांच्या आधारे तक्रारदाराला काम मिळणार असल्याचा विश्वास देण्यात आला.या फसवणुकीत वापरण्यात आलेली कागदपत्रे कोणी तयार केली, डिजिटल स्वाक्षऱ्या कशा वापरण्यात आल्या आणि आर्थिक व्यवहार नेमके कुठे व कसे झाले, याचा तपास पोलिसांकडून सुरू आहे.

प्रकरणाचे गांभीर्य लक्षात घेऊन पोलीस आयुक्त संदीप कर्णिक यांनी संशयितांचा तातडीने शोध घेण्याचे आदेश दिले होते. त्यानुसार पोलिसांनी कारवाईचा वेग वाढवला आहे.आता या प्रकरणात आणखी कोणाचा सहभाग आहे, बनावट कागदपत्रांच्या निर्मितीमागे कोण आहे, तसेच फसवणुकीतून मिळालेल्या पैशांचा व्यवहार कुठे झाला, याचा सखोल तपास सुरू आहे. त्यामुळे कुंभमेळा बनावट वर्कऑर्डर प्रकरणात आगामी काळात आणखी अटक होण्याची शक्यता आहे.