देशभरात पेपर लीक प्रकरणावरून राजकीय वातावरण तापलेले असतानाच पंजाबमधून धक्कादायक घटना समोर आली आहे. संगरूर जिल्ह्यातील भाजपच्या जिल्हा कार्यालयावर पेट्रोल बॉम्बने हल्ला करण्यात आला असून, या घटनेमुळे परिसरात एकच खळबळ उडाली आहे. सुदैवाने या हल्ल्यात कोणतीही जीवितहानी झाली नसली, तरी कार्यालयाचे काही प्रमाणात नुकसान झाले आहे.
पोलिसांनी दिलेल्या माहितीनुसार, रविवारी पहाटे सुमारे तीन वाजण्याच्या सुमारास अज्ञात हल्लेखोरांनी बिअरच्या बाटलीचा वापर करून पेट्रोल बॉम्ब तयार केला आणि तो भाजप कार्यालयावर फेकला. बॉम्ब कार्यालयाच्या भिंतीवर आदळून फुटल्याने आग लागली. घटनेची माहिती मिळताच अग्निशमन दल आणि पोलिसांनी घटनास्थळी धाव घेत आग आटोक्यात आणली.
घटनेनंतर पोलिसांनी परिसराची पाहणी करून तपास सुरू केला आहे. संगरूरचे पोलिस अधीक्षक (एसपी) दविंदर अत्री यांनी सांगितले की, अज्ञात व्यक्तींविरुद्ध गुन्हा दाखल करण्यात आला असून हल्लेखोरांचा शोध घेण्यासाठी विविध पथके कामाला लागली आहेत. या प्रकरणातील आरोपींवर कठोर कारवाई करण्यात येईल आणि कोणालाही सोडले जाणार नाही, असे त्यांनी स्पष्ट केले.
दरम्यान, भाजप कार्यालयावर हल्ला होण्याची ही पहिलीच घटना नाही. यापूर्वीही गेल्या महिन्यात एका भाजप नेत्याच्या दवाखान्यावर पेट्रोल बॉम्ब फेकण्यात आल्याची घटना घडली होती. त्यामुळे पुन्हा एकदा अशाच प्रकारचा हल्ला झाल्याने पंजाबमधील कायदा व सुव्यवस्थेचा प्रश्न ऐरणीवर आला आहे.
या घटनेमागील नेमके कारण अद्याप स्पष्ट झाले नसून, पोलिसांकडून सर्व बाजूंनी तपास सुरू आहे. आरोपींचा शोध घेण्यासाठी परिसरातील सीसीटीव्ही फुटेज आणि इतर तांत्रिक पुरावे तपासले जात आहेत.
Discussion about this post