नवी दिल्ली । नीट (NEET) पेपरफुटी प्रकरणावरून दिल्लीतील जंतर-मंतर येथे सुरू असलेल्या आंदोलनादरम्यान केंद्र सरकार आणि कॉक्रोच जनता पार्टी (CJP) यांच्यातील चर्चेची दुसरी फेरी शुक्रवारी पार पडली. केंद्रीय मंत्री जे. पी. नड्डा आणि डॉ. जितेंद्र सिंह यांनी सीजेपीच्या शिष्टमंडळाशी सुमारे दोन तास चर्चा केली. या बैठकीत सीजेपीने मांडलेल्या तीन प्रमुख मागण्यांपैकी दोन मागण्या सरकारने मान्य केल्याची माहिती समोर आली आहे. मात्र, केंद्रीय शिक्षणमंत्री धर्मेंद्र प्रधान यांच्या राजीनाम्याच्या मागणीवर अद्याप निर्णय झालेला नाही.
सीजेपीच्या शिष्टमंडळात राष्ट्रीय प्रवक्ते आशुतोष रांका आणि सौरव दास यांचा समावेश होता. बैठकीत त्यांनी धर्मेंद्र प्रधान यांच्या राजीनाम्याबरोबरच आंदोलनादरम्यान विद्यार्थ्यांवर दाखल झालेले गुन्हे मागे घेणे आणि आत्महत्या केलेल्या नीट उमेदवारांच्या कुटुंबीयांना आर्थिक मदत देण्याची मागणी केली.
दोन मागण्या मान्य, राजीनाम्यावर उद्यापर्यंतची मुदत
बैठकीनंतर आशुतोष रांका यांनी सांगितले की, विद्यार्थ्यांवरील गुन्हे मागे घेणे आणि मृत विद्यार्थ्यांच्या कुटुंबीयांना आर्थिक मदत देणे या दोन मागण्या सरकारने तत्त्वतः मान्य केल्या आहेत. मात्र, धर्मेंद्र प्रधान यांच्या राजीनाम्याच्या मागणीवर निर्णय घेण्यासाठी सरकारने उद्या दुपारपर्यंतचा अवधी मागितला आहे. यामुळे शिक्षणमंत्र्यांच्या भवितव्याबाबत राजकीय चर्चांना उधाण आले असून, उद्याच्या बैठकीकडे सर्वांचे लक्ष लागले आहे.
‘उद्या पुन्हा चर्चा होणार’
बैठकीनंतर केंद्रीय मंत्री जे. पी. नड्डा यांनी सांगितले की, सीजेपीने तीन प्रमुख मागण्या आणि परीक्षा व्यवस्थेतील सुधारणांसाठी पाच सूचना मांडल्या आहेत. या सर्व मुद्द्यांवर सरकार गंभीरपणे विचार करणार असून, उद्या दुपारी पुन्हा बैठक घेऊन पुढील निर्णय कळवला जाईल, असे त्यांनी स्पष्ट केले.
आंदोलन कायम राहणार
दरम्यान, धर्मेंद्र प्रधान यांचा राजीनामा स्वीकारला जात नाही तोपर्यंत आंदोलन सुरूच राहील, अशी भूमिका सीजेपीने पुन्हा स्पष्ट केली आहे. त्यामुळे सरकार आणि आंदोलनकर्त्यांमधील पुढील चर्चेकडे देशभरातील विद्यार्थी आणि पालकांचे लक्ष लागले आहे.
Discussion about this post