मुक्ताईनगर | महाराष्ट्रात विक्रीस बंदी असलेल्या गुटखा आणि पानमसाल्याच्या तस्करीविरोधात मुक्ताईनगर पोलिसांनी मोठी कारवाई करत ८ लाख २० हजार ५०० रुपयांचा मुद्देमाल जप्त केला आहे. या प्रकरणातील मुख्य आरोपीविरुद्ध गुन्हा दाखल करण्यात आला असून तो अद्याप फरार असल्याने पोलिसांकडून त्याचा शोध सुरू आहे.
पोलिसांनी दिलेल्या माहितीनुसार, मुक्ताईनगर–बऱ्हाणपूर मार्गावरील आरंभ हॉटेलसमोरील सार्वजनिक रस्त्यावर नियमित तपासणी सुरू होती. यावेळी संशयास्पद हालचाली आढळून आल्याने एमएच २८ एके ८९९९ क्रमांकाच्या इनोव्हा वाहनाची तपासणी करण्यात आली.
तपासणीदरम्यान वाहनात महाराष्ट्रात प्रतिबंधित असलेला केसरयुक्त विमल पानमसाला आणि व्ही-बिग तंबाखू मोठ्या प्रमाणात साठवून वाहतूक केली जात असल्याचे उघड झाले. पोलिसांनी तात्काळ कारवाई करत सुमारे ४ लाख २० हजार रुपयांचा गुटखा, ४ लाख रुपयांची इनोव्हा कार आणि ५०० रुपयांचा मोबाईल असा एकूण ८ लाख २० हजार ५०० रुपयांचा मुद्देमाल जप्त केला.
या प्रकरणी शेख सलीम शेख इस्माईल (वय ५९, रा. गौरकशनवाडी, ता. चिखली, जि. बुलढाणा) याच्याविरुद्ध मुक्ताईनगर पोलीस ठाण्यात गुन्हा दाखल करण्यात आला आहे. त्याच्यावर भारतीय न्याय संहिता (BNS) तसेच अन्न सुरक्षा व मानके अधिनियमातील विविध कलमान्वये कारवाई करण्यात आली आहे.
या प्रकरणाची फिर्याद अन्न सुरक्षा अधिकारी योगराज किशोर सूर्यवंशी यांनी दिली असून, पुढील तपास सहाय्यक पोलीस निरीक्षक जयेश पाटील करीत आहेत. दरम्यान, आरोपी फरार असून त्याचा शोध घेण्यासाठी पोलिसांनी विशेष पथके रवाना केली आहेत.
Discussion about this post