रावेर | रावेर तालुक्यातील नांदूरखेडा शिवारात मजूर तरुणाचा गळा आवळून खून केल्याप्रकरणी रावेर पोलिसांनी आणि जळगाव स्थानिक गुन्हे शाखेने (एलसीबी) अवघ्या २४ तासांत गुन्ह्याचा छडा लावत दोन आरोपींना अटक केली आहे. अनैतिक संबंधांमधून निर्माण झालेला वाद आणि जुन्या मारहाणीचा सूड या दुहेरी कारणातून ही हत्या झाल्याचे प्राथमिक तपासात निष्पन्न झाले आहे. मुख्य आरोपीला मध्य प्रदेशातून ताब्यात घेण्यात आले.
या प्रकरणी रावेर पोलीस ठाण्यात गुन्हा क्रमांक ३४३/२०२६ अन्वये भारतीय न्याय संहिता (BNS) कलम १०३(१) आणि ३(५) अंतर्गत गुन्हा दाखल करण्यात आला आहे. फिर्यादी शेख सलमान शेख शब्बीर (वय २७, रा. उचंदा, ता. मुक्ताईनगर) यांनी तक्रार दिली आहे.
पोलिसांनी अटक केलेल्या आरोपींमध्ये गणेश संजय घोरपडे (वय २७, रा. भोर, ता. रावेर) आणि मेघराज वसंत सांगळे (वय २९, रा. भोर, ता. रावेर) यांचा समावेश आहे.
अनैतिक संबंधातून निर्माण झाला वाद
तपासात समोर आलेल्या माहितीनुसार, मुख्य आरोपी गणेश घोरपडे याचे मयताच्या पत्नीसोबत अनैतिक संबंध होते. एप्रिल २०२६ मध्ये ऐनपूर येथे दोघांना नागरिकांनी रंगेहात पकडल्यानंतर गणेशला बेदम मारहाण करण्यात आली होती. या घटनेचा राग त्याच्या मनात कायम होता. त्यानंतर त्याने मयताला जीवे मारण्याची धमकी दिल्याचेही तपासात निष्पन्न झाले आहे.
दारू पाजून निर्जन शेतात नेले
९ जुलैच्या रात्री आरोपींनी मयताला दारू पाजून मोटारसायकलवरून नांदूरखेडा शिवारातील निर्जन भागात नेले. तेथे दोघांनी मिळून त्याचा गळा दाबून खून केला. त्यानंतर मृतदेह शेतात टाकून आरोपी घटनास्थळावरून पसार झाले.
११ जुलै रोजी सकाळी मृतदेह आढळल्यानंतर परिसरात खळबळ उडाली. रावेर पोलीस ठाण्याचे तपास अधिकारी पीएसआय मनोज महाजन यांनी तातडीने तपास सुरू केला. गोपनीय माहिती आणि तांत्रिक विश्लेषणाच्या आधारे मेघराज सांगळे याला प्रथम ताब्यात घेण्यात आले.
मध्य प्रदेशातून मुख्य आरोपीला अटक
मुख्य आरोपी गणेश घोरपडे हा गुन्ह्यानंतर मध्य प्रदेशात पळून गेला होता. पोलीस अधीक्षक श्रीकांत धिवरे यांच्या मार्गदर्शनाखाली स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांच्या नेतृत्वाखाली विशेष पथकाने त्याचा शोध सुरू केला.पीएसआय संतोष पवार, हेड कॉन्स्टेबल सलीम तडवी, पोलीस कॉन्स्टेबल रवींद्र चौधरी आणि सचिन घुगे यांच्या पथकाने मध्य प्रदेशातील सागवानी परिसरात सापळा रचून मुख्य आरोपीला शिताफीने ताब्यात घेतले.
पोलिसांच्या तत्परतेचे कौतुक
अत्यंत क्लिष्ट स्वरूपाचा हा खुनाचा गुन्हा अवघ्या २४ तासांत उघडकीस आणल्याबद्दल पोलीस अधीक्षक श्रीकांत धिवरे यांनी रावेर पोलीस आणि स्थानिक गुन्हे शाखेच्या पथकाचे कौतुक केले आहे. या प्रकरणाचा पुढील तपास रावेर पोलीस करीत आहेत.
Discussion about this post