जळगाव । जळगाव जिल्ह्यातील कुपोषित बालकांच्या समस्येवरून राज्य विधानपरिषदेत सत्ताधारी आणि विरोधकांमध्ये महत्त्वाची चर्चा झाली. ज्येष्ठ आमदार एकनाथ खडसे यांनी उपस्थित केलेल्या प्रश्नाला उत्तर देताना, महिला व बालविकास मंत्री अदिती तटकरे यांनी जळगाव जिल्ह्यातील कुपोषणाचे प्रमाण गेल्या वर्षभरात घटल्याचा दावा लेखी उत्तराद्वारे केला आहे. जिल्ह्यातील कुपोषणाचा टक्का आता ०.३१ टक्क्यांवर खाली आला असल्याचे शासनाने स्पष्ट केले आहे.
विधानपरिषदेत आमदार एकनाथ खडसे यांनी महिला व बालविकास विभागाच्या आकडेवारीचा दाखला देत जळगाव जिल्ह्यातील बालकांच्या पोषणस्थितीबाबत गंभीर चिंता व्यक्त केली होती. जिल्ह्यातील हजारो बालके अद्यापही कमी वजनाची आणि तीव्र कुपोषणाच्या श्रेणीत आहेत. या बालकांना कुपोषणाच्या गर्तेतून बाहेर काढण्यासाठी आणि त्यांच्या आरोग्यासाठी शासनाने आतापर्यंत नेमक्या कोणत्या ठोस उपाययोजना केल्या आहेत, असा रोखठोक सवाल खडसे यांनी उपस्थित केला होता.
आमदार खडसे यांच्या प्रश्नाला उत्तर देताना बालविकास मंत्री अदिती तटकरे यांनी सांगितले की, जिल्ह्यात ‘पोषण ट्रॅकर’ प्रणालीद्वारे प्रत्येक बालकाच्या उंची आणि वजनाची डिजिटल पद्धतीने नियमित नोंद घेतली जाते. या अचूक माहितीच्या आधारेच बालकांच्या पोषणस्थितीचे वर्गीकरण केले जाते.
शासनाच्या नोंदीनुसार मार्च २०२५ मध्ये कुपोषणाचे प्रमाण ०.३९ टक्के होते, ते मार्च २०२६ मध्ये ०.३१ टक्क्यांवर आले, असा दावा त्यांनी केला. कुपोषणावर प्रभावी नियंत्रण मिळविण्यासाठी शासनाकडून विविध योजना राबविल्या जात असल्याचेही त्यांनी स्पष्ट केले. सहा महिने ते तीन वर्षे वयोगटातील बालके, गरोदर महिला आणि स्तनदा मातांना ‘टेक होम रेशन’ (THR) योजनेतून पोषक आहार दिला जात आहे. तसेच तीन ते सहा वर्षे वयोगटातील बालकांना अंगणवाड्यांमधून गरम व ताजा आहार उपलब्ध करून दिला जात असल्याचे सांगण्यात आले.
याशिवाय तीव्र कुपोषित (SAM) बालकांसाठी विशेष पोषणयुक्त आहार देण्यात येत असून, ‘पोषण अभियान’ अंतर्गत बालकांच्या आयुष्यातील पहिल्या एक हजार दिवसांच्या पोषणाचे महत्त्व पालकांपर्यंत पोहोचवण्यासाठी जनजागृती मोहीमही राबविण्यात येत असल्याची माहिती सरकारने विधानपरिषदेत दिली.
दरम्यान, जळगाव जिल्ह्यातील कुपोषणाची समस्या पूर्णपणे दूर करण्यासाठी शासनाच्या योजनांची प्रभावी अंमलबजावणी आणि सातत्यपूर्ण देखरेख आवश्यक असल्याची अपेक्षा व्यक्त केली जात आहे.
Discussion about this post