मुंबई : राज्यातील राजकीय घडामोडींना पुन्हा वेग आला असून उपमुख्यमंत्री सुनेत्रा पवार यांच्या नेतृत्वाखालील राष्ट्रवादी काँग्रेस पक्षाला मराठवाड्यात मोठा धक्का बसला आहे. परभणी जिल्हा राष्ट्रवादी काँग्रेसचे जिल्हाध्यक्ष आणि पक्षाचे ज्येष्ठ नेते प्रताप देशमुख यांनी आपल्या पदाचा तडकाफडकी राजीनामा दिला आहे. त्यांच्या या निर्णयामुळे जिल्ह्याच्या राजकारणात चर्चांना उधाण आले आहे.
सूत्रांकडून मिळालेल्या माहितीनुसार, प्रताप देशमुख लवकरच उपमुख्यमंत्री एकनाथ शिंदे यांच्या नेतृत्वाखालील शिवसेनेत प्रवेश करण्याची शक्यता व्यक्त केली जात आहे. मात्र, त्यांच्या प्रवेशाबाबत अद्याप अधिकृत घोषणा झालेली नाही.
प्रताप देशमुख हे अजित पवार गटातील विश्वासू नेत्यांपैकी एक मानले जातात. राष्ट्रवादी काँग्रेसच्या कोट्यातून परभणीचे पहिले महापौर होण्याचा मानही त्यांना मिळाला होता. त्यांनी राजीनाम्यामागे वैयक्तिक कारण असल्याचे सांगितले असले, तरी स्थानिक राजकीय घडामोडी आणि पक्षातील नाराजी हेच त्यामागील प्रमुख कारण असल्याची चर्चा राजकीय वर्तुळात सुरू आहे.
नुकत्याच झालेल्या निवडणुकीत परभणी मतदारसंघात संख्याबळ असूनही राष्ट्रवादी काँग्रेसने आपला दावा मागे घेतल्याने स्थानिक पदाधिकारी आणि कार्यकर्त्यांमध्ये नाराजी होती. त्यानंतर पक्षाच्या आदेशानुसार शिवसेनेच्या उमेदवारासाठी काम करावे लागल्याने अनेक कार्यकर्त्यांमध्ये असंतोष वाढल्याचे सांगितले जात आहे. याच पार्श्वभूमीवर देशमुख यांनी राजीनाम्याचा निर्णय घेतल्याचे बोलले जात आहे.
दरम्यान, मुख्यमंत्री एकनाथ शिंदे मराठवाड्यात शिवसेनेचे संघटन अधिक मजबूत करण्यासाठी प्रयत्नशील असल्याचे मानले जात आहे. अशा परिस्थितीत प्रताप देशमुख यांच्यासारख्या प्रभावी नेत्याचा संभाव्य प्रवेश झाल्यास परभणीसह मराठवाड्यातील राजकीय समीकरणांवर त्याचा परिणाम होण्याची शक्यता व्यक्त केली जात आहे.
देशमुख यांच्या पुढील राजकीय भूमिकेकडे आता राज्यातील राजकीय वर्तुळाचे लक्ष लागले आहे.
Discussion about this post