मुंबई : राज्य सरकारच्या मुख्यमंत्री माझी लाडकी बहिण योजनेचा जून महिन्याचा हप्ता अद्याप लाभार्थी महिलांच्या बँक खात्यात जमा झालेला नसल्याने राज्यभरातील लाखो महिलांमध्ये उत्सुकता वाढली आहे. जून महिना संपत आला असतानाही १,५०० रुपयांचा हप्ता न मिळाल्याने महिलांकडून सातत्याने चौकशी केली जात आहे.
मिळालेल्या माहितीनुसार, जून महिन्याचा हप्ता 12 ते 15 जुलैदरम्यान लाभार्थींच्या खात्यात जमा होण्याची शक्यता आहे. मात्र, याबाबत राज्य सरकारकडून अद्याप कोणतीही अधिकृत घोषणा करण्यात आलेली नाही.
दरम्यान, राज्य सरकारकडून योजनेअंतर्गत लाभार्थींच्या अर्जांची पडताळणी आणि ई-केवायसी (e-KYC) प्रक्रिया मोठ्या प्रमाणावर राबविण्यात आली आहे. या पडताळणीत निकष पूर्ण न करणारे किंवा अपात्र ठरलेले अनेक अर्ज बाद करण्यात आले आहेत. त्यामुळे योजनेचा लाभ केवळ पात्र महिलांनाच मिळणार असल्याचे स्पष्ट करण्यात आले आहे.
यापूर्वीही काही वेळा दोन महिन्यांचे हप्ते एकत्रितपणे लाभार्थींच्या खात्यात जमा करण्यात आले होते. त्यामुळे यंदाही निधी वितरणात काही दिवसांचा विलंब झाला असला तरी महिलांनी घाबरण्याचे कारण नसल्याचे प्रशासनातील सूत्रांचे म्हणणे आहे.
लाडकी बहिण योजनेचा निधी डीबीटी प्रणालीद्वारे थेट लाभार्थींच्या बँक खात्यात जमा केला जाणार आहे. पडताळणीची प्रक्रिया पूर्ण झाल्यानंतर निधी वितरणाला वेग येण्याची अपेक्षा व्यक्त केली जात आहे. दरम्यान, जून महिन्याचा हप्ता 12 ते 15 जुलैदरम्यान जमा होण्याची शक्यता वर्तवली जात असली, तरी यासंदर्भातील अधिकृत आदेश किंवा घोषणा अद्याप जारी झालेली नाही. त्यामुळे लाभार्थी महिलांनी सरकारच्या अधिकृत माहितीकडे लक्ष ठेवण्याचे आवाहन करण्यात येत आहे.
Discussion about this post