जळगाव | जळगाव स्थानिक स्वराज्य संस्था मतदारसंघाच्या विधान परिषद निवडणुकीसाठी दाखल झालेल्या उमेदवारी अर्जांची छाननी प्रक्रिया पूर्ण झाली असून सर्व १६ उमेदवारांचे अर्ज वैध ठरले आहेत. त्यामुळे निवडणुकीच्या रणधुमाळीला आता वेग आला असून राजकीय घडामोडींना अधिक रंग चढला आहे.
विधान परिषद निवडणुकीसाठी अंतिम दिवशी एकूण १६ उमेदवारांनी अर्ज दाखल केले होते. महायुतीतर्फे भाजपचे नंदकिशोर (नंदू) महाजन तर महाविकास आघाडीतर्फे ठाकरे गटाचे शरद तायडे हे प्रमुख उमेदवार मैदानात आहेत. याशिवाय शिवसेना शिंदे गटाच्या नगरसेविका रेश्मा काळे यांनी बंडखोरीचा झेंडा उभारत स्वतंत्र उमेदवारी दाखल केल्याने निवडणुकीत वेगळीच रंगत निर्माण झाली आहे. अनिल चौधरी यांच्यासह अन्य उमेदवारांनीही आपले अर्ज सादर केले आहेत.
निवडणूक निर्णय अधिकाऱ्यांच्या उपस्थितीत आज उमेदवारी अर्जांची छाननी करण्यात आली. काही अर्जांमध्ये किरकोळ त्रुटी आढळून आल्याने संबंधित उमेदवारांना लेखी सूचना देण्यात आल्या. मात्र आवश्यक कागदपत्रांची पूर्तता झाल्याने छाननीअंती सर्व १६ उमेदवारांचे अर्ज वैध घोषित करण्यात आले. यंदाच्या निवडणुकीत महायुतीकडून भाजपाचे उमेदवार, महाविकास आघाडीचे अधिकृत उमेदवार तसेच शिवसेना शिंदे गटातील बंडखोर उमेदवार मैदानात उतरल्याने चुरशीची लढत होण्याची शक्यता व्यक्त केली जात आहे.
उमेदवारी अर्ज मागे घेण्याच्या अंतिम मुदतीनंतर निवडणुकीचे चित्र अधिक स्पष्ट होणार असले तरी सध्या तरी जळगाव विधान परिषद निवडणुकीत बहुरंगी सामना रंगण्याची चिन्हे दिसत आहेत. स्थानिक स्वराज्य संस्थांच्या सदस्यांच्या मतांवर या निवडणुकीचा निकाल अवलंबून असल्याने सर्वच पक्षांनी आपापली मोर्चेबांधणी सुरू केली आहे.
दरम्यान, अर्ज वैध ठरल्यानंतर उमेदवारांनी प्रचाराच्या तयारीला वेग दिला असून आगामी काही दिवसांत राजकीय आरोप-प्रत्यारोप आणि मतदार संपर्क मोहिमा अधिक तीव्र होण्याची शक्यता आहे.
Discussion about this post