कर्नाटकात महा-उलटफेर! मुख्यमंत्री सिद्धरामय्यांचा राजीनामा, आता नवीन सीएम कोण?

बंगळुरू : कर्नाटकच्या राजकारणात आज मोठा राजकीय भूकंप झाला असून मुख्यमंत्री सिद्धरामय्या यांनी अखेर आपल्या पदाचा राजीनामा जाहीर केला आहे. गेल्या अनेक महिन्यांपासून सुरू असलेल्या सत्तासंघर्षानंतर काँग्रेस हायकमांडने अखेर नेतृत्वबदलाचा निर्णय घेतला असून, आता उपमुख्यमंत्री डी. के. शिवकुमार यांच्या मुख्यमंत्रीपदाचा मार्ग मोकळा झाला आहे.

आज सकाळी मुख्यमंत्री निवासस्थानी आयोजित मंत्रिमंडळाच्या ब्रेकफास्ट बैठकीत सिद्धरामय्या यांनी मंत्र्यांसमोर मुख्यमंत्रीपद सोडत असल्याची घोषणा केली. त्यानंतर ते राज्यपालांची भेट घेऊन अधिकृत राजीनामा सादर करणार असल्याची माहिती सूत्रांनी दिली आहे. या घडामोडींमुळे कर्नाटकच्या राजकीय वर्तुळात मोठी खळबळ उडाली आहे.

२०२३ मध्ये काँग्रेस सरकार स्थापन झाल्यानंतर मुख्यमंत्रीपदासाठी सिद्धरामय्या आणि डीके शिवकुमार यांच्यात अडीच-अडीच वर्षांचा फॉर्म्युला ठरल्याची चर्चा होती. मात्र सरकारला तीन वर्षे पूर्ण होत आली तरी सत्तांतर होत नसल्याने डीके समर्थकांनी दबाव वाढवला होता. अखेर दिल्लीतील वरिष्ठ नेत्यांच्या बैठकीनंतर सिद्धरामय्या यांनी पद सोडण्यास तयारी दर्शवल्याचे समोर आले आहे.

सूत्रांच्या माहितीनुसार, सिद्धरामय्या यांना राज्यसभेवर पाठवण्याचा प्रस्ताव देण्यात आला असून त्यांच्या मुलाला उपमुख्यमंत्रीपद देण्याबाबतही चर्चा झाली आहे. त्यामुळे हा निर्णय काँग्रेसच्या ‘समन्वय फॉर्म्युल्या’चा भाग असल्याचे बोलले जात आहे.

दरम्यान, डी. के. शिवकुमार लवकरच मुख्यमंत्रीपदाची शपथ घेणार असल्याने कर्नाटकमध्ये काँग्रेसच्या नव्या नेतृत्वाची औपचारिक सुरुवात होणार आहे.