जळगाव । जळगाव शहरात गेल्या काही दिवसांपासून प्रतिबंधित प्लास्टिकचा वापर पुन्हा वाढल्याच्या तक्रारी समोर येत होत्या. याची गंभीर दखल घेत जळगाव महानगरपालिकेने मंगळवारी सायंकाळी मध्यवर्ती बाजारपेठेत अचानक धडक कारवाई केली. विशेष म्हणजे, महापौर दीपमाला काळे यांनी स्वतः या कारवाईचे नेतृत्व केल्याने शहरातील व्यापारी, दुकानदार आणि हातगाडी चालकांमध्ये एकच खळबळ उडाली.
महापौरांनी यापूर्वीच प्लास्टिक बंदीबाबत कठोर सूचना दिल्या होत्या. काही काळ व्यापाऱ्यांनी नियमांचे पालन केले; मात्र अलीकडे शहरात पुन्हा सर्रास प्लास्टिक वापर सुरू झाल्याच्या तक्रारी मनपाकडे येत होत्या. त्यानंतर मंगळवारी सायंकाळी राजकमल टॉकीज परिसर, तिजोरी गल्ली, अशोक टॉकीज गल्ली, दाणा बाजार, नेताजी सुभाषचंद्र चौक आणि फुले मार्केट परिसरात अचानक तपासणी करण्यात आली.
महापौर दीपमाला काळे स्वतः अधिकाऱ्यांसह पायी फिरून तपासणी करत असल्याचे पाहताच अनेक दुकानदार, भाजी विक्रेते, फळ विक्रेते आणि हातगाडी चालकांची धावपळ उडाली. काहींनी प्लास्टिक पिशव्या लपविण्याचाही प्रयत्न केला.तपासणीदरम्यान अनेक दुकानांमध्ये प्रतिबंधित प्लास्टिक आढळून आले. महापालिकेच्या आरोग्य विभागाने जागेवरच प्लास्टिक जप्त केले, तर नियमांचे उल्लंघन करणाऱ्यांवर दंड ठोठावण्यात आला. यावेळी महापौरांनी विक्रेत्यांना “ग्राहकांना वस्तू कशात देता?” असा सवाल करत पर्यावरणपूरक पर्याय वापरण्याचे आवाहन केले.
विशेष म्हणजे, यापूर्वीही कारवाई झालेल्या काही दुकानांमध्ये पुन्हा प्लास्टिक वापर आढळून आल्याने मनपाने कठोर भूमिका घेतली. जवाहर क्लोथ स्टोअर्स आणि एच. आर. ट्रेडर्स या दुकानांवर प्रत्येकी १० हजार रुपयांचा दंड आकारण्यात आला.“यापुढे प्रतिबंधित प्लास्टिक वापरताना आढळल्यास संबंधित दुकान थेट सील करण्यात येईल,” असा स्पष्ट इशारा महापौर दीपमाला काळे यांनी दिला.
Discussion about this post