जळगाव । सहकारी संस्थेमधील उपनिबंधक जगदीश बाबुराव बारी आणि खासगी एजंट देविदास पाटील याला दीड लाखाची लाच घेताना जळगावमधील लाचलुचपत प्रतिबंधक विभागाने रंगेहात अटक केली होती. दरम्यान याबाबत ACBने मोठी कारवाई करत सहकारी संस्थेच्या उपनिबंधकाच्या लॉकरवर छापा टाकून तब्बल १ कोटी ७ लाख ४४ हजार रुपयांचा मुद्देमाल जप्त केला आहे. या कारवाईमुळे शासकीय वर्तुळात मोठी खळबळ उडाली आहे.
लाचलुचपत प्रतिबंधक विभागाने दिलेल्या माहितीनुसार, उपनिबंधक जगदीश बारी यांच्याविरोधात भ्रष्टाचार प्रतिबंधक अधिनियमांतर्गत कारवाई करण्यात आली आहे. यापूर्वी २० मे रोजी त्यांच्यावर यशस्वी सापळा कारवाई करण्यात आली होती. त्यानंतर पुढील तपासादरम्यान त्यांच्या भुसावळ येथील बँक लॉकरची माहिती समोर आली.
त्यानुसार अधिकाऱ्यांनी लॉकरची झडती घेतली असता मोठ्या प्रमाणात सोन्या-चांदीचे दागिने आणि रोकड आढळून आली. जप्त मुद्देमालामध्ये सुमारे ६६० ग्रॅम वजनाचे सोन्याचे हार, बांगड्या व इतर दागिने, १० किलो ५०० ग्रॅम वजनाचे चांदीचे दागिने तसेच ८ लाख ३६ हजार ५०० रुपयांची रोकड आढळली. या सर्व मुद्देमालाची एकूण किंमत १ कोटी ७ लाख ४४ हजार ७५ रुपये इतकी असल्याची माहिती ACB ने दिली.
दरम्यान, लाचखोर जगदीश बारीला न्यायालयात हजर करण्यात आले असून न्यायालयाने त्याला २३ मेपर्यंत पोलीस कोठडी सुनावली आहे. या प्रकरणाचा पुढील तपास सुरू असून आर्थिक व्यवहार आणि मालमत्तेची चौकशीही करण्यात येत आहे. ही कारवाई पोलीस उपअधीक्षक योगेश ठाकूर यांच्या नेतृत्वाखालील पथकाने केली. वरिष्ठ अधिकाऱ्यांच्या मार्गदर्शनाखाली ही संपूर्ण कारवाई पार पडली असल्याची माहिती विभागाकडून देण्यात आली आहे.
Discussion about this post