बोदवड हादरले! चोरीचा संशय घेतल्याच्या रागातून मित्राचा भोसकून खून

बोदवड । घरी झालेल्या चोरीचा संशय आपल्यावर व्यक्त केल्याचा राग मनात धरून एका मित्रानेच मित्राचा भरदिवसा भोसकून खून केल्याची धक्कादायक घटना बोदवड शहरात घडली आहे. या घटनेमुळे परिसरात खळबळ उडाली असून,

नेमकी घटना काय?
बोदवड शहरात राहणारे अन्सार पिंजारी यांच्या घरात काही दिवसांपूर्वी चोरी झाली होती. या चोरीच्या संदर्भात अन्सार यांनी त्यांचा परिचित असलेला मित्र अरबाज शहा याच्यावर पोलिसात संशय व्यक्त केला होता. आपल्यावर चोरीचा संशय घेतल्याचे कळताच अरबाज शहा संतप्त झाला होता आणि त्याने अन्सार पिंजारी यांना थेट जीवे मारण्याची धमकी दिली होती.

या धमकीनंतर बुधवारी अरबाज शहाने अन्सार पिंजारी यांच्यावर धारदार शस्त्राने वार करून त्यांना भोसकून ठार केले. संशयावरून मित्रानेच मित्राचा घात केल्याने बोदवड शहरात तणावाचे वातावरण निर्माण झाले आहे. घटनेची माहिती मिळताच स्थानिक पोलिसांसह जळगावचे अप्पर पोलीस अधीक्षक संदीप गावित तातडीने बोदवड येथे स्पॉटवर दाखल झाले आहेत. त्यांनी घटनास्थळाची बारकाईने पाहणी केली असून, कायदा व सुव्यवस्था राखण्यासाठी परिसरात चोख पोलीस बंदोबस्त तैनात करण्यात आला आहे.

घटनेनंतर संशयित आरोपी अरबाज शाह हा फरार झाला असून, बोदवड पोलीस आणि गुन्हे शाखेची पथके त्याच्या शोधासाठी रवाना करण्यात आली आहेत. “आरोपीला लवकरच बेड्या ठोकल्या जातील, पोलिसांची पथके वेगवेगळ्या मार्गांवर रवाना झाली आहेत,” अशी माहिती पोलीस प्रशासनाकडून देण्यात आली आहे. याप्रकरणी बोदवड पोलीस ठाण्यात गुन्हा दाखल करण्याची प्रक्रिया सुरू आहे.