कर्नाटकच्या कोडगू जिल्ह्यातील प्रसिद्ध ‘दुबारे एलिफंट कॅम्प’ मध्ये एक अत्यंत भयंकर आणि काळजाचा ठोका चुकवणारी घटना घडली आहे. कावेरी नदीच्या पात्रात हत्तींच्या आंघोळीचा आनंद घेत असताना अचानक दोन हत्तींमध्ये झालेल्या जीवघेण्या झुंजीत चेन्नई येथील एक ३३ वर्षीय महिला पर्यटक खाली पडून चिरडली गेली. या अपघातात गंभीर जखमी झालेल्या या महिलेचा उपचारादरम्यान मृत्यू झाला असून, या घटनेमुळे पर्यटन वर्तुळात प्रचंड खळबळ उडाली आहे. या घटनेचा थरकाप उडवणारा व्हिडीओ समोर आला असून तो व्हायरल होत आहे.
२ हत्तींच्या झुंजीमध्ये चेन्नई येथून आलेली ३३ वर्षीय महिला पर्यटक खाली पडली. हत्ती अंगावर पडल्यानंतर महिला त्याखाली चिरडली गेली. यावेळी या महिलेच्या नवऱ्याने तिला वाचवण्याचा प्रयत्न केला पण त्याला यश आले नाही. हत्तीच्या पायाखाली चिरडून महिला गंभीर जखमी झाली. या महिलेला तात्काळ उपचारासाठी रुग्णालयात नेण्यात आले. यावेळी उपचारादरम्यान तिचा मृत्यू झाला. जिनू असं मृत महिलेचे नाव असून ती तामिळनाडूच्या चेन्नई येथे राहत होती.
Tragedy at Karnataka’s Dubare Elephant Camp.
A 33-year-old tourist lost her life after a makeshift structure collapsed during an elephant bathing session following a clash between two elephants. pic.twitter.com/zeXw0Bnx1t
— TIMES NOW (@TimesNow) May 18, 2026
या घटनेनंतर प्रशासन आणि वन विभागाच्या अधिकाऱ्यांनी चौकशी सुरू केली. या घटनेमुळे दुबारे हत्ती कॅम्पमधील पर्यटकांच्या सुरक्षा व्यवस्थेवर प्रश्नचिन्ह उपस्थित केले जात आहे. दुबारे हत्ती कॅम्प हे कर्नाटकातील एक प्रसिद्ध पर्यटन स्थळ आहे. या ठिकाणी हत्तींना जवळून पाहण्यासाठी आणि त्यांच्याशी संबंधित उपक्रमांचा अनुभव घेण्यासाठी मोठ्या संख्येने पर्यटक याठिकाणी येत असतात.
दुबारे एलिफंट कॅम्प हे कर्नाटकातील कोडगू जिल्ह्यातल्या कावेरी नदीच्या काठावर वसलेले आहे. हे प्रसिद्ध पर्यटन स्थळ असून याठिकाणी हत्ती प्रशिक्षण केंद्र देखील आहे. हे कॅम्प त्याच्या नैसर्गिक सौंदर्यासाठी, निसर्गरम्य वातावरण आणि हत्तींसोबतच्या अनोख्या अनुभवांसाठी पर्यटकांमध्ये लोकप्रिय आहे. येथे प्रशिक्षित हत्तींची काळजी वन विभागाच्या देखरेखीखाली घेतली जाते. या कॅम्पला अनेक पर्यटक दरवर्षी भेट देत असतात. ते याठिकाणी हत्तींना आंघोळ घालण्याचा, त्यांना खाऊ घालण्याचा आणि त्यांच्या वर्तनाचे जवळून निरीक्षण करण्याचा अनुभव घेतात. याच कॅम्पमध्ये महिला पर्यटकाचा मृत्यू झाल्यामुळे हा एक चर्चेचा विषय ठरला आहे.
Discussion about this post