देशातील वैद्यकीय प्रवेशासाठी अत्यंत महत्त्वाची मानली जाणारी NEET-UG २०२६ ही परीक्षा अखेर पेपर लीक झाल्याच्या गंभीर आरोपांनंतर राष्ट्रीय परीक्षा एजन्सीने (NTA) रद्द केली आहे. ३ मे रोजी झालेल्या या परीक्षेचा पेपर फुटल्याचे तपासात निष्पन्न झाल्यामुळे केंद्र सरकारने हा मोठा निर्णय घेतला असून, संपूर्ण प्रकरणाचा तपास आता सीबीआयकडे (CBI) सोपवण्यात आला आहे.
या निर्णयामुळे परीक्षा दिलेल्या सुमारे २३ लाख विद्यार्थ्यांमध्ये तीव्र नाराजी आणि चिंतेचे वातावरण पसरले आहे. ‘NTA’ ने दिलेल्या माहितीनुसार, रद्द झालेली परीक्षा आता नव्याने घेतली जाणार असून पुढील ७ ते १० दिवसांत नव्या परीक्षेची तारीख जाहीर करण्यात येईल.
पेपर फुटल्याच्या आरोपांनंतर अनेक विद्यार्थ्यांनी संताप व्यक्त करत परीक्षेच्या पारदर्शकतेवर प्रश्न उपस्थित केले होते. अखेर संबंधित यंत्रणांनी परीक्षा रद्द करण्याचा निर्णय घेतला. आता नव्या परीक्षेसाठी आधीच्या नोंदणीचाच वापर करण्यात येणार असून, विद्यार्थ्यांना पुन्हा अर्ज करण्याची गरज भासणार नाही. तसेच कोणतेही अतिरिक्त परीक्षा शुल्क आकारले जाणार नसल्याची माहिती समोर आली आहे.
दरम्यान, पेपर लीक प्रकरणाचा तपास वेगाने सुरू असून, महाराष्ट्रासह विविध राज्यांत छापेमारी आणि अटकसत्र सुरू आहे. राजस्थानमध्ये एका राजकीय पक्षाच्या पदाधिकाऱ्यालाही अटक करण्यात आल्याची माहिती समोर आली आहे. या प्रकरणामुळे राजकीय वातावरणही तापले असून, विरोधकांनी सरकारवर तीव्र टीका सुरू केली आहे. विद्यार्थी आणि पालकांमध्ये मात्र नव्या परीक्षेच्या तारखेबाबत चिंता कायम आहे. अनेक विद्यार्थ्यांनी पुन्हा अभ्यासाचे नियोजन सुरू केले असून, लवकरात लवकर स्पष्ट निर्णय जाहीर करण्याची मागणी होत आहे.
Discussion about this post