जळगाव । चाळीसगाव तालुक्यातील टाकळी प्रचा गावात हृदय पिळवटून टाकणारी घटना समोर आली आहे. सचिता दीपक बोरसे या अवघ्या अडीच महिन्यांच्या बालिकेला जिल्हा परिषद शाळेत मेडिकल कैंपमधून घरी आणल्यानंतर अवघ्या दहा मिनिटांत तिची प्रकृती बिघडली आणि तिचा मृत्यू झाला. या धक्कादायक घटनेनंतर जळगाव शासकीय वैद्यकीय महाविद्यालय व रुग्णालयाच्या (जीएमसी) संतापजनक कारभारामुळे मृत बालिकेच्या आजोबांना संपूर्ण रात्र नातीचा मृतदेह मांडीवर घेऊन शवविच्छेदन कक्षाबाहेर काढावी लागली. या घटनेमुळे संपूर्ण महाराष्ट्रातून तीव्र संतापाची लाट उसळली आहे.
पोलिओ डोस ठरला काळ?
टाकळी प्रचा गावातील जिल्हा परिषद शाळेत आरोग्य विभागामार्फत पोलिओ आणि नियमित लसीकरण मोहीम सुरू होती. येथील शिबिरात अयोध्या येथे सैन्यदलात कार्यरत असलेले जवान दीपक दगा बोरसे यांच्या अडीच महिन्यांच्या सचिता या लेकीला पोलिओ डोस व लस देण्यात आली. मात्र, लस टोचल्यानंतर अवघ्या १० मिनिटांतच चिमुकलीची प्रकृती कमालीची खालावली. घाबरलेल्या कुटुंबीयांनी तिला तातडीने चाळीसगाव येथील खाजगी रुग्णालयात हलवले, मात्र तेथे डॉक्टरांनी तिला मृत घोषित केले. दोन थेंबांनी थेट चिमुकलीचा जीव घेतल्याचा आरोप करत कुटुंबीयांवर दुःखाचा डोंगर कोसळला.
लसीकरणामुळे मृत्यू झाल्याने मृत्यूचे नेमके कारण शोधण्यासाठी पोलिसांनी मृतदेह जळगाव शासकीय रुग्णालयात शवविच्छेदनासाठी पाठवला. रात्री दोन वाजेच्या सुमारास बालिकेचे आजोबा तुळशीदास शिवदास मराठे हे नातीचा मृतदेह घेऊन रुग्णालयात पोहोचले. परंतु, येथील कर्तव्यावर असलेल्या डॉक्टर आणि कर्मचाऱ्यांनी मृतदेह ताब्यात घेण्यास साफ टाळाटाळ केली. “रात्री पोस्टमार्टम होत नाही” असे सांगून त्यांनी मृतदेह कोल्ड स्टोरेजमध्ये (शवपेटी) ठेवण्यासही नकार दिला.परिणामी, निष्पाप चिमुकलीचा मृतदेह मांडीवर घेऊन आजोबांना रात्रभर शवविच्छेदन विभागाच्या गेटबाहेर बसून राहावे लागले.
सकाळी रुग्णालयात आलेल्या नागरिकांना जेव्हा हा हृदयद्रावक प्रकार दिसला, तेव्हा अनेकांच्या डोळ्यात पाणी आले. आजोबा मांडीवर मृतदेह घेऊन बसल्याचा व्हिडिओ आणि फोटो पसरताच रुग्णालय प्रशासनाची धावपळ उडाली. प्रशासनाने खडबडून जागे होत घाईघाईने मृतदेह शवविच्छेदनासाठी ताब्यात घेतला.
Discussion about this post