जळगाव । एरंडोल तालुक्यातील कासोदा येथे कृषी विभाग आणि पोलीस प्रशासनाने संयुक्त कारवाई करत अनधिकृत ‘HTBT’ (तणनाशक सहनशील) कापूस बियाण्यांचा मोठा साठा जप्त केला आहे. या कारवाईत सुमारे ४ लाख ८० हजार रुपये किमतीची बियाणे पाकिटे आणि एक कार असा एकूण ९.८० लाखांचा मुद्देमाल हस्तगत करण्यात आला आहे.यामुळे बोगस बियाणे माफियांमध्ये प्रचंड खळबळ उडाली आहे.
नेमकी घटना काय?
कासोदा परिसरामध्ये काही व्यक्ती स्वतःच्या आर्थिक फायद्यासाठी छुप्या पद्धतीने प्रतिबंधित ‘HTBT’ कापूस बियाण्यांची विक्री करत असल्याची गोपनीय माहिती कृषी विभागाला मिळाली होती. या माहितीच्या आधारे कृषी आणि पोलीस विभागाच्या संयुक्त पथकाने या ठिकाणी छापा टाकून तपासणी केली असता, संबंधित संशयितांकडे अनधिकृत बियाण्यांचा मोठा साठा आढळून आला.
पथकाने केलेल्या या धडक कारवाईत प्रीमियम रिसर्च हायब्रीड कॉटन सीड’, ‘श्री गणेशा +५जी’ आणि ‘आकाश +५जी’ या ब्रँडच्या नावाखाली पॅक केलेली ४०० बियाणे पाकिटे (अंदाजे किंमत ४,८०,००० रुपये) व वाहतुकीसाठी वापरलेली मारुती स्विफ्ट डिझायर गाडी (अंदाजे किंमत ५ लाख रुपये) असा एकूण ९ लाख ८० हजाराचा मुद्देमाल जप्त केला आहे. याप्रकरणी प्रकरणी योगेश बळवंत पाटील (रा. सौंदाणे, जि. धुळे) आणि नितीन देवरे (रा. वाडीभोकंर, जि. धुळे) या दोघांविरुद्ध कासोदा पोलीस स्टेशनमध्ये गुन्हा दाखल करण्यात आला आहे.
Discussion about this post