जळगाव । चाळीसगाव येथे प्रेम प्रकरणाच्या नावाखाली तरुणीला जाळ्यात ओढून तिचे आक्षेपार्ह फोटो व व्हिडिओ सोशल मीडियावर व्हायरल करण्याची धमकी देत तब्बल आठ लाखांची खंडणी उकळल्याचा धक्कादायक प्रकार उघडकीस आला आहे. या प्रकरणी पोलिसांनी यश महेंद्र जैन या तरुणाला अटक केली आहे.
पोलिसांनी दिलेल्या प्राथमिक माहितीनुसार, आरोपी यश जैन याने पीडित तरुणीसोबत आधी जवळीक साधली. त्यानंतर तिचे काही वैयक्तिक आणि आक्षेपार्ह फोटो व व्हिडिओ आपल्या मोबाईलमध्ये रेकॉर्ड केले. हेच फोटो सोशल मीडियावर व्हायरल करून बदनामी करण्याची धमकी देत त्याने पीडितेकडे पैशांची मागणी सुरू केली. इज्जत वाचवण्यासाठी पीडित तरुणीने वेळोवेळी आरोपीला तब्बल ८ लाख रुपये दिले. मात्र, आरोपीची पैशांची हाव आणि त्रास दिवसेंदिवस वाढतच गेल्याने अखेर हे प्रकरण पोलिसांपर्यंत पोहोचले.
अटकेनंतर पोलिसांनी जेव्हा आरोपी यश जैन याचा मोबाईल जप्त करून त्याची प्राथमिक तपासणी केली, तेव्हा या प्रकरणाला अत्यंत गंभीर वळण मिळाले. आरोपीच्या मोबाईलमध्ये केवळ तक्रारदार तरुणीचेच नव्हे, तर इतरही काही तरुणींचे आक्षेपार्ह फोटो आणि व्हिडिओ आढळून आले आहेत. त्यामुळे हा आरोपी केवळ एका तरुणीपुरता मर्यादित नसून, तो अनेक मुलींना आपल्या जाळ्यात ओढणारा सराईत ब्लॅकमेलर असण्याची दाट शक्यता निर्माण झाली आहे.
पोलिसांनी संशयित आरोपी यश जैन याला न्यायालयात (कोर्टात) हजर केले असून, न्यायालयाने त्याला पोलीस कोठडी सुनावली आहे. सध्या पोलिसांचे सायबर पथक आरोपीच्या मोबाईलमधील डिलीट केलेला डेटा आणि इतर डिजिटल पुराव्यांची (Digital Evidence) सखोल तांत्रिक तपासणी करत आहे. या नराधमाने याच पद्धतीने आणखी किती तरुणींना ब्लॅकमेल करून त्यांची आर्थिक व मानसिक पिळवणूक केली आहे का? याचा शोध आता पोलीस घेत आहेत. त्यामुळे येत्या काळात या प्रकरणात आणखी मोठे आणि धक्कादायक खुलासे होण्याची शक्यता वर्तवली जात आहे.
Discussion about this post