भुसावळच्या राजकीय वर्तुळातून मोठी बातमी ! लोकनियुक्त नगराध्यक्षा गायत्री भंगाळे अपात्र

भुसावळ । भुसावळ राजकीय वर्तुळातून एक मोठी बातमी समोर येत आहे. भुसावळ नगर परिषदेच्या लोकनियुक्त नगराध्यक्षा गायत्री भंगाळे यांना नगराध्यक्ष आणि नगरसेवक पदावरून अपात्र ठरवण्यात आले आहे. नगर विकास विभागाच्या सहसचिव विद्या हम्पय्य यांनी २३ एप्रिल २०२६ पासून हा आदेश लागू केला असून, यामुळे शहरात एकच खळबळ उडाली आहे.

काय आहे नेमकं प्रकरण?

भुसावळ नगरपालिकेच्या निवडणुकीत गायत्री भंगाळे यांनी राष्ट्रवादी काँग्रेस (शरद पवार गट) कडून निवडणूक लढवली होती. त्यांनी ‘अनुसूचित जाती’ (SC) प्रवर्गातून विजय मिळवत नगराध्यक्ष पद भूषवले होते. मात्र, त्यांच्या जात प्रमाणपत्राच्या वैधतेवर सुरुवातीपासूनच प्रश्नचिन्ह उपस्थित केले जात होते.

गायत्री भंगाळे यांच्या जात प्रमाणपत्रावर रजनी सावकारे, प्रमोद सावकारे, राहुल तायडे आणि संजय तायडे यांनी आक्षेप घेत जात पडताळणी समितीकडे तक्रार दाखल केली होती. सुनावणी दरम्यान गायत्री गौरव भंगाळे या मुळ उत्तर प्रदेशातील महोबा येथील असून त्यांच्या वडिलांच्या व काकाच्या शालेय नोंदीमध्ये कुर्मी अशी जात नोंद असल्याचे पुरावे सादर केले होते. स्थलांतरित व्यक्तींना दुसऱ्या राज्यात अनुसूचित जातीचा लाभ मिळत नाही, असा युक्तिवादही त्यांनी मांडला होता.

23 एप्रिल 2026 रोजी जात पडताळणी जिल्हा समितीने अनुसूचित जातीचे प्रमाणपत्र अवैध ठरवले होते. या निर्णयाच्या पार्श्वभूमीवर जळगाव जिल्ह्याचे जिल्हाधिकारी यांनी शासनाकडे प्रस्ताव सादर केला होता. त्यानुसार महाराष्ट्र नगरपरिषद अधिनियम 1965 मधील तरतुदीनुसार भुसावळच्या लोकनियुक्त नगराध्यक्ष गायत्री भंगाळे यांची निवड रद्द ठरविण्याचा निर्णय घेतला आहे. गायत्री भंगाळे यांना नगरसेवक व नगराध्यक्ष म्हणून अपात्र ठरवण्यात आले असून याची नोंद शासकीय राज्यपत्रात प्रसिद्ध करण्यात येणार आहे.