अमळनेर | पेव्हर ब्लॉक आणि गटारीच्या कामाचे १२ लाख रुपयांचे बिल मंजूर करून दिल्याचा मोबदला म्हणून ५० हजार रुपयांची लाच स्वीकारताना नगाव (ता. अमळनेर) येथील ग्रामविकास अधिकारी रवींद्र देविदास पवार यांना लाचलुचपत प्रतिबंधक विभागाने (ACB) रंगेहात पकडले. अमळनेर शहरातील केलेनगर भागात ३० एप्रिल रोजी ही कारवाई करण्यात आली.
मिळालेल्या माहितीनुसार, नगाव बुद्रुक येथे झालेल्या गटारीच्या व पेव्हर ब्लॉकच्या कामाचे १२ लाख रुपयांचे बिल मंजूर करण्यासाठी ग्रामविकास अधिकारी रवींद्र पवार यांनी ७ टक्के दराने ८४ हजार रुपयांच्या कमिशनची मागणी केली होती. यातील १३०० रुपये पवार यांनी आधीच ‘फोन पे’द्वारे स्वीकारले होते. उर्वरित रकमेसाठी तक्रारदाराने ३० एप्रिल रोजी जळगाव लाचलुचपत प्रतिबंधक विभागाकडे तक्रार नोंदवली होती.
स्वतःच्या घरीच स्वीकारली लाच
तक्रारीची शहानिशा केल्यानंतर एसीबीने ढेकू रस्त्यावरील केलेनगर भागात असलेल्या रवींद्र पवार यांच्या घराबाहेर सापळा रचला. तडजोडीअंती ठरलेली ५० हजार रुपयांची रक्कम स्वीकारताच दबा धरून बसलेल्या पथकाने त्यांना रंगेहात पकडले. या कारवाईमुळे अमळनेर महसूल आणि ग्रामपंचायत प्रशासनात मोठी खळबळ उडाली आहे.
आजारपणामुळे अटक टळली, पण गुन्हा दाखल
ग्रामविकास अधिकारी रवींद्र पवार यांना किडनीचा गंभीर त्रास असून ते नुकतेच धुळ्याहून डायलिसिस करून परतले होते. त्यांच्या या प्रकृती अस्वास्थ्यामुळे त्यांना तातडीने अटक करण्यात आली नाही, मात्र कायदेशीर प्रक्रियेनुसार त्यांना नोटीस बजावण्यात आली आहे. रात्री उशिरापर्यंत अमळनेर पोलीस ठाण्यात गुन्हा दाखल करण्याचे काम सुरू होते.
लाचलुचपत प्रतिबंधक विभागाचे डीवायएसपी योगेश ठाकूर यांच्या मार्गदर्शनाखाली सापळा अधिकारी हेमंत नागरे, स्मिता नवघरे, दिनेशसिंग पाटील, सुरेश पाटील, बाळू मराठे, किशोर महाजन, सुनील वानखेडे, भूषण पाटील, मनोज पाटील, प्रणेश ठाकूर, अमोल सूर्यवंशी आणि सचिन चाटे यांच्या पथकाने ही यशस्वी कारवाई केली.
Discussion about this post