मुंबई: गेल्या अनेक दिवसांपासून महाराष्ट्र राजकीय वर्तुळात चर्चेत असलेला विधान परिषदेच्या उमेदवारीवरून महाविकास आघाडीचा सस्पेन्स आज संपला आहे. मविआकडून उद्धव ठाकरे हे विधानपरिषदेवर जाणार असल्याचे बोलले जात होते, मात्र आता उद्धव ठाकरे यांच्याऐवजी अंबादास दानवे यांना महाविकास आघाडीचे तिकीट देण्यात आले आहे
महाविकास आघाडीमध्ये या जागेसाठी ठाकरे गट प्रचंड आग्रही होता. सुरुवातीला उद्धव ठाकरे स्वतः विधान परिषदेत जाणार असल्याचे बोलले जात होते. महाविकास आघाडीतील घटक पक्ष असलेल्या काँग्रेसने देखील ठाकरेंच्या उमेदवारीला पाठिंबा दर्शवला होता, मात्र आज अखेर ठाकरे गटाचे आमदार आदित्य ठाकरे यांनी उद्धव ठाकरे हे विधान परिषदेवर जाणार नसल्याची माहिती देत अंबादास दानवे हे महाविकास आघाडीचे उमेदवार असतील अशी माहिती दिली आहे. या आधीही दानवे यांनी विधान परिषदेत विरोधी पक्षनेता म्हणून काम पाहिलेले आहे.
अंबादास दानवे यांच्या उमेदवारीच्या घोषणेबाबत संजय राऊत यांनी ट्विट केले आहे. राऊत यांनी म्हटले की, अंबादास दानवे हे शिवसेनेचे म्हणजेच महाविकास आघाडीचे विधान परिषदेचे उमेदवार असतील. उद्या 11 वाजता ते उमेदवारी अर्ज दाखल करतील, शिवसेना पक्षप्रमुख उद्धव ठाकरे यांनी दानवे यांच्या नावाची घोषणा केली.
Discussion about this post