१०वी पास ते पदवीधरानं केंद्रीय नोकरीची सुवर्णसंधी ! तब्बल ३,००३ जागांसाठी भरती सुरु

सरकारी नोकरीच्या शोधात असलेल्या उमेदवारांसाठी आनंदाची बातमी समोर आली आहे. केंद्र सरकारच्या विविध विभागांमध्ये भरतीची मोठी संधी उपलब्ध झाली असून स्टाफ सिलेक्शन कमिशन (SSC) द्वारे देशभरातील विविध पदांसाठी एकूण 3003 जागांची भरती प्रक्रिया सुरू करण्यात आली आहे.

विशेष म्हणजे, यासाठी १०वी उत्तीर्ण असलेल्या उमेदवारांपासून ते पदवीधरांपर्यंत सर्वांना अर्ज करता येणार आहे. या भरतीसाठी अर्ज प्रक्रिया सुरू झाली आहे. इच्छुक उमेदवार आयोगाच्या अधिकृत वेबसाइट ssc.gov.in वर जाऊन ऑनलाइन अर्ज करू शकतात. या पदांसाठी अर्ज करण्याची अंतिम मुदत ४ मे २०२६ आहे आणि शुल्क भरण्याची अंतिम मुदत ५ मे २०२६ आहे. अर्जातील चुका दुरुस्त करण्याची विंडो ११ मे ते १३ मे २०२६ पर्यंत खुली आहे. अर्ज करताना चुका करणाऱ्यांना त्या दुरुस्त करण्याची ही संधी मिळेल, त्यामुळे अंतिम मुदतीपूर्वी अर्ज भरा आणि तो काळजीपूर्वक तपासा.

या भरतीद्वारे एकूण ३,००३ पदे भरली जाणार आहेत. त्यापैकी, १,५३४ पदे अनारक्षित प्रवर्गासाठी, ६६७ ओबीसी प्रवर्गासाठी, ३४६ एससी प्रवर्गासाठी, २७१ ईडब्ल्यूएस प्रवर्गासाठी आणि १८५ एसटी प्रवर्गासाठी आहेत. यापैकी, आरोग्य आणि कुटुंब कल्याण मंत्रालयांतर्गत केंद्रीय सरकारी आरोग्य योजनेतील (CGHS) वैद्यकीय परिचारकांसाठी (medical attendants) सर्वाधिक २३५ पदे आहेत.

वयोमर्यादा
या भरतीसाठी वयोमर्यादा 1 जानेवारी 2026 रोजी 18 ते 25, 27, 28 किंवा 30 वर्षे अशी पदांनुसार निश्चित करण्यात आली आहे. राखीव प्रवर्गातील उमेदवारांसाठी सरकारी नियमांनुसार सवलत देण्यात आली असून, यामध्ये SC/ST उमेदवारांना 5 वर्षे, तर OBC उमेदवारांना 3 वर्षांची वयोमर्यादा सूट लागू असेल.

पात्रता काय?
ही भरती दहावी, बारावी आणि पदवी पूर्ण केलेल्या सर्व तरुणांसाठी आहे. आयोगाने विविध पात्रतेनुसार वेगवेगळी पदे जाहीर केली आहेत, त्यामुळे तुम्ही तुमच्या शिक्षण आणि पात्रतेनुसार योग्य पदाची निवड करू शकता.

अर्ज शुल्क :
अर्ज शुल्क म्हणून जनरल आणि OBC उमेदवारांना 100 रुपये भरावे लागणार आहेत, तर SC/ST, PWD, माजी सैनिक आणि महिला उमेदवारांसाठी अर्ज पूर्णपणे विनामूल्य आहेत. ही संपूर्ण भरती प्रक्रिया ऑनलाईन पद्धतीने पार पडणार असून, इच्छुक उमेदवारांना एसएससीच्या अधिकृत संकेतस्थळावर (ssc.gov.in) जाऊन अर्ज सादर करायचे आहेत.