जळगाव । जिल्ह्यातील चाळीसगाव तालुक्यातून एक हृदयद्रावक अपघाताची घटना समोर आली आहे. भरधाव वेगाने धावणाऱ्या वाळूने भरलेल्या डंपरने दुचाकीला जोरदार धडक दिल्याने डी फार्मसीचे शिक्षण घेणाऱ्या विद्यार्थिनीचा जागीच मृत्यू झाला, तर तिची मैत्रीण गंभीर जखमी झाली आहे. ही दुर्घटना गुरुवार, २ एप्रिल रोजी दुपारच्या सुमारास दसेगाव फाट्याजवळ घडली.
या अपघातात चंचल नामदेव लांडगे (वय १९) हिचा जागीच मृत्यू झाला असून तिच्यासोबत असलेली वैष्णवी वैभव चौधरी (वय १९) ही गंभीर जखमी झाली आहे. अपघातानंतर नागरिकांनी तत्काळ मदत करत जखमींना जवळच्या रुग्णालयात दाखल केले. सध्या वैष्णवी हिच्यावर उपचार सुरू असून तिची प्रकृती चिंताजनक असल्याची माहिती मिळत आहे.
दरम्यान, या भीषण घटनेनंतर परिसरातील नागरिकांमध्ये तीव्र संतापाची लाट उसळली. अवैध वाळू वाहतुकीविरोधात संतप्त नागरिकांनी काही काळ रस्ता रोको आंदोलन करत निषेध व्यक्त केला. तालुक्यात वाढत चाललेल्या अवैध वाळू वाहतुकीवर तातडीने कठोर कारवाई करावी, अशी जोरदार मागणी करण्यात येत आहे. या घटनेमुळे पुन्हा एकदा अवैध वाळू वाहतुकीचा मुद्दा ऐरणीवर आला असून प्रशासनाच्या कारवाईकडे नागरिकांचे लक्ष लागले आहे.
Discussion about this post