नवी दिल्ली । दिल्ली पोलिसांनी मोठी कारवाई करत लष्कर-ए-तोएबाशी संबंधित दहशतवादी शब्बीर अहमद लोन याला अटक केली आहे. गुप्त माहितीच्या आधारे दिल्ली सीमेवर सापळा रचून ही कारवाई करण्यात आली. देशभरात सक्रिय असलेल्या त्याच्या नेटवर्कचा पर्दाफाश करण्यासाठी सध्या त्याची एका गुप्त ठिकाणी कसून चौकशी सुरू आहे.
प्राथमिक तपासात धक्कादायक बाब समोर आली असून, शब्बीर अहमद लोन हा पाकिस्तानच्या गुप्तचर संस्था आयएसआयच्या थेट निर्देशांनुसार भारतात काम करत असल्याचे उघड झाले आहे. भारतात लष्कर-ए-तोएबाचे नवीन आणि धोकादायक मॉड्यूल उभारणे, तसेच स्थानिक तरुणांना दहशतवादी कारवायांसाठी प्रवृत्त करणे ही त्याची मुख्य जबाबदारी होती.
तपास यंत्रणांच्या माहितीनुसार, गेल्या काही दिवसांत दिल्ली आणि कोलकाता परिसरात भारतविरोधी पोस्टर्स लावून वातावरण बिघडवण्याचा प्रयत्न करण्यात आला होता. विशेषतः काश्मिरी गेट बस स्थानक आणि मेट्रो स्थानक परिसरात आढळलेल्या पोस्टर्समुळे सुरक्षा यंत्रणा सतर्क झाल्या होत्या. या संपूर्ण पोस्टर मोहिमेचे संचालन शब्बीर अहमद लोन बांगलादेशमधून करत असल्याचेही तपासात उघड झाले आहे.
दरम्यान, काही महिन्यांपूर्वी लाल किल्ला परिसरात झालेल्या बॉम्बस्फोटाच्या घटनेनंतर दिल्ली पोलिसांनी दहशतवादाविरोधात विशेष मोहीम हाती घेतली आहे. शब्बीरच्या अटकेमुळे या प्रकरणाशी संबंधित आणखी मोठे धागेदोरे मिळण्याची शक्यता व्यक्त केली जात आहे. सुरक्षा यंत्रणा सध्या त्याच्या भारतातील प्रवेशमार्ग, स्थानिक संपर्क आणि संभाव्य कटांविषयी सखोल तपास करत आहेत.
Discussion about this post