नाशिक । भोंदू बाबा प्रकरणात अडकलेल्या अशोक खरात याच्या कथित आर्थिक गैरव्यवहाराचे धागेदोरे आता अधिक स्पष्ट होत असून शिवनिका ट्रस्टच्या व्यवहारांवर पोलिसांनी लक्ष केंद्रित केले आहे. ट्रस्टच्या आर्थिक उलाढालीत अचानक झालेली वाढ आणि संशयास्पद व्यवहारांमुळे या प्रकरणाची चौकशी अधिक तीव्र करण्यात आली आहे.
तपासादरम्यान, 2018 साली केवळ काही लाखांची उलाढाल असलेल्या ट्रस्टची मालमत्ता काही वर्षांत कोट्यवधी रुपयांपर्यंत पोहोचल्याचे समोर आले आहे. त्यामुळे या निधीचा स्रोत काय आणि तो कशा मार्गाने जमा झाला, याचा तपास पोलीस करत आहेत. तसेच हवाला व्यवहाराच्या माध्यमातून मोठ्या प्रमाणात पैसा परदेशात पाठवण्यात आल्याचा आरोपही तपासाच्या केंद्रस्थानी आहे.
दरम्यान, शिवनिका ट्रस्टचे आर्थिक व्यवहार सांभाळणारे चार्टर्ड अकाउंटंट ललित पोफळे यांची भूमिका संशयाच्या भोवऱ्यात सापडली आहे. पोलिसांकडून त्यांची चौकशी होण्याची शक्यता व्यक्त केली जात आहे. विशेष म्हणजे, स्वतःचा बचाव करण्यासाठी ललित पोफळे यांनी संबंधित व्यक्तीविरोधात तक्रार दाखल करण्यासाठी पोलीस स्टेशन गाठल्याची माहिती समोर आली आहे.
उद्योजकांच्या आर्थिक क्षमतेनुसार त्यांना ललित पोफळे हा वेगवेगळया व्यक्तिंकडे नेत असायचा. 1000 कोटींपेक्षा जास्त उलाढाल असलेल्या उद्योजकांना बंगळूरुतील लक्ष्मण महाराज, 500 कोटींपेक्षा जास्त असेलल्याना भोंदू अशोक खरात तर 200 कोटींपेक्षा जास्त असलेल्या सुजीत देशमुख यांच्याकडे नेण्यात येत होते. तसेच रघुनाथ येमुळ या ज्योतिषाकडे अनेक कस्टमर नेण्यात आले होते.
Discussion about this post