भंडारा । महाराष्ट्रातील भंडारा-गोंदिया मतदारसंघाचे काँग्रेस खासदारडॉ. प्रशांत पडोले हे पुन्हा एकदा रस्ते अपघातातून बचावले आहेत. सोमवारी सकाळी नागपूर विमानतळाच्या दिशेने जात असताना त्यांच्या कारला ट्रकने धडक दिल्याची घटना घडली. या अपघातात खासदारांसह त्यांचा ड्रायव्हर जखमी झाला असून दोघांनाही खासगी रुग्णालयात उपचारासाठी दाखल करण्यात आले आहे.
दिल्लीमध्ये सुरू असलेल्या संसदेच्या अधिवेशनात सहभागी होण्यासाठी डॉ. प्रशांत पडोलेहे भंडाऱ्यावरून नागपूरकडे निघाले होते. मात्र नागपूरजवळ एअरपोर्ट मार्गावर असताना अचानक एका ट्रकने त्यांच्या वाहनाला जोरदार धडक दिली. अपघातानंतर वाहनाचे मोठे नुकसान झाले, तर खासदारांना किरकोळ दुखापत झाली.
अपघातानंतर खासदारांनी सोशल मीडियावरून या घटनेची माहिती देत केंद्रीय मंत्री नितीन गडकरी यांना टॅग केले. “खासदार सुरक्षित नाही, तिथे जनतेचं काय होणार?” असा सवाल त्यांनी उपस्थित केला. तसेच अपघाताच्या वेळी कारमधील एअरबॅग उघडली नसल्याबद्दलही त्यांनी प्रश्नचिन्ह उपस्थित केले आहे.
दरम्यान, हा याच मार्गावरील तिसरा अपघात असल्याचे समोर आले आहे. यापूर्वी 2025 सालीही डॉ. प्रशांत पडोले हे रस्ते अपघातात जखमी झाले होते. वारंवार अशा घटना घडत असल्याने या प्रकरणाची सखोल चौकशी करण्याची मागणी स्थानिक स्तरावरून होत आहे. काही नागरिकांनी या घटनांमागे घातपाताचा संशय व्यक्त केला असून प्रशासनाने याकडे गांभीर्याने लक्ष देण्याची गरज असल्याचे मत व्यक्त होत आहे.
अपघातानंतर किरकोळ दुखापत असूनही खासदारांनी दुसऱ्या वाहनाची मदत घेत नागपूर गाठले, प्राथमिक उपचार घेतले आणि त्यानंतर नियोजित कार्यक्रमासाठी दिल्लीकडे रवाना झाल्याची माहिती मिळाली आहे.
Discussion about this post