मुंबई : महाराष्ट्र राज्य विधिमंडळच्या अर्थसंकल्पीय अधिवेशनाला आजपासून मुंबईत प्रारंभ झाला. वर्षातील सर्वात महत्त्वाचे मानले जाणारे हे अधिवेशन राज्याच्या आर्थिक आणि धोरणात्मक दिशेला आकार देणारे ठरणार आहे. पहिल्याच दिवशी राज्यपाल आचार्य देवव्रत यांनी विधिमंडळाच्या दोन्ही सभागृहांना संबोधित करत सरकारच्या कामगिरीचा आढावा मांडला. यावेळी राज्यपाल आचार्य देवव्रत यांनी केलेल्या भाषणात अनेक विषयांवर भाष्य केले. आपल्या अभिभाषणात त्यांनी राज्याच्या आर्थिक प्रगतीचा लेखाजोखा सादर करताना उद्योग, शेती, पायाभूत सुविधा आणि सामाजिक क्षेत्रातील उपक्रमांचा उल्लेख केला.
‘विकसित महाराष्ट्र’चा रोडमॅप
राज्याच्या सर्वांगीण विकासासाठी सरकार कटिबद्ध असल्याचा पुनरुच्चार करताना ‘विकसित महाराष्ट्र’ घडवण्याचा निर्धार राज्यपालांनी व्यक्त केला. गुंतवणूक वाढ, रोजगारनिर्मिती आणि ग्रामीण-शहरी दरी कमी करण्यावर विशेष भर देण्यात येणार असल्याचे संकेत दिले.
यावेळी त्यांनी विशेषतः दावोस येथील जागतिक आर्थिक परिषदेचा उल्लेख केला. त्यांनी सांगितले की, दावोस करारातून राज्यात ३० लाख कोटी रुपयांची विक्रमी गुंतवणूक अपेक्षित आहे. यामुळे राज्याच्या जीडीपीमध्ये महाराष्ट्राचा वाटा १३ टक्क्यांवर पोहोचला आहे. यामुळे परदेशी थेट गुंतवणुकीत (FDI) महाराष्ट्र देशात पुन्हा एकदा अग्रेसर ठरला आहे. शेतकऱ्यांचे उत्पन्न वाढवण्यासाठी सरकार आता आधुनिक तंत्रज्ञानाचा वापर करणार आहे. कृषी उत्पादकता वाढवण्यासाठी आणि पीक नियोजनासाठी आर्टिफिशियल इंटेलिजन्स (AI) तंत्रज्ञानाचा मोठ्या प्रमाणावर वापर करण्याचे धोरण सरकारने आखले आहे, असे राज्यपाल म्हणाले.
दरम्यान येत्या २०२६ ते २०३० या कालावधीसाठी राज्याचे नवीन उद्योग आणि सेवा धोरण जाहीर करण्यात आले आहे. या धोरणामुळे सेवा क्षेत्रात आणि उद्योगांमध्ये मोठ्या प्रमाणावर रोजगाराच्या संधी उपलब्ध होतील, असा विश्वास राज्यपाल आचार्य देवव्रत यांनी व्यक्त केला.
अर्थसंकल्प, शेतकरी प्रश्न, पायाभूत सुविधा प्रकल्प, तसेच विविध कल्याणकारी योजनांवरील चर्चा या अधिवेशनात रंगण्याची शक्यता आहे. विरोधकांकडूनही सरकारला कोंडीत पकडण्याची रणनीती आखली जात असल्याने सभागृहात जोरदार खडाजंगी होण्याची चिन्हे आहेत.
एकूणच, अर्थसंकल्पीय अधिवेशनाच्या पहिल्याच दिवशी सरकारने विकासाचा अजेंडा स्पष्ट करत आगामी धोरणांची दिशा ठरवली असून पुढील काही दिवस राज्याच्या राजकारणासाठी निर्णायक ठरणार आहेत.
Discussion about this post