ते वक्तव्य भोवले! नवज्योत कौर सिद्धूंचे काँग्रेसमधून तडकाफडकी निलंबन

हरयाणा : पंजाबमधील काँग्रेसमध्ये चांगलाच भूकंप झाल्याचं पाहायला मिळत आहे. कारण नवज्योत कौर सिद्धूंचे काँग्रेसमधून तडकाफडकी निलंबन करण्यात आले आहे.

नवज्योत कौर सिद्धू यांनी दोन दिवसांपूर्वी खळबळजनक दावा केला होता. त्यानुसार, पंजाब काँग्रेसमध्ये मुख्यमंत्रीपदासाठी आणि तिकीट देण्यासाठी कोट्यवधि रुपयांची डील केली जाते, असं वक्तव्य केलं होते. त्यांनी केलेल्या वक्तव्यावरुन त्या चांगल्याच अडचणीत आल्या होत्या. त्यामुळे, गेल्या काही महिन्यांपासून काँग्रेसमध्ये सक्रीय नसल्याने आणि पक्षाच्या भूमिकेविरुद्ध वक्तव्य केल्याचा ठपका ठेवत काँग्रेसमधून नवज्योत कौर सिद्धू यांचे निलंबन करण्यात आलं.

नवज्योत कौर सिद्धू या काँग्रेसच्या माजी आमदार असून काँग्रेस नेते आणि क्रिकेटर नवज्योत सिंग सिद्धू यांच्या पत्नी आहेत. राज्यातील तरनतारण पोटनिवडणुकीत काँग्रेस उमेदवार करणबीर सिंह बुर्ज यांना तिकीट देण्यासाठी 5 कोटी रुपये घेण्यात आले होते, एकूण रक्कम 11 कोटीपर्यंत पोहोचल्याचा खळबळजनक दावा नवज्योत कौर सिद्धू यांनी केला होता. विशेष म्हणजे पक्षातील वरिष्ठ नेत्यांच्या सांगण्यावरुनच हे काम करण्यात आलं असून अनेक नगरसेवक याबाबत बोलायला तयार आहेत, आपल्याकडे त्याचं कॉल रेकॉर्डिंग असल्याचेही नवज्योत कौर यांनी म्हटलं होतं.