जळगाव । जळगाव जिल्ह्यात गुन्हेगारीने डोकंवर काढले असून यात खुनाच्या घटना सातत्याने समोर येत आहे. अशातच नेहमीच्या वादाला कंटाळलेल्या पत्नीने संतापाच्या भरात पतीच्या डोक्यात कुऱ्हाडीने वार करून हत्या केल्याची खळबळजनक घटना रावेर तालुक्यातील निंभोरा बु. गावात घडली आहे.
रावेर तालुक्यातील निंभोरा बु. गावातील न्यू इंग्लिश स्कूलचे निवृत्त शिपाई हुसेन रसूल तडवी (वय ६५) असे घटनेत मृत व्यक्तीचे नाव आहे. माजी ग्रामपंचायत सदस्या हाजराबाई हुसेन तडवी (वय ६०) असे पतीची हत्या करणाऱ्या महिलेचे नाव आहे. सदर घटना गणेश कॉलनीत घडली. हुसेन तडवी हे पत्नी हाजराबाई तडवी यांना सतत मारहाण करून त्रास देत होता.
दरम्यान दोघांमध्ये वाद झाला. या वादात संतापलेल्या हजराबाई यांनी हुसेन तडवी यांच्या मानेवर व डोक्यावर कुऱ्हाडीने वार करून खून केला. या घटनेने परिसरात खळबळ उडाली असून पोलिसांना घटनेची माहिती मिळताच पोलीस घटनास्थळी दाखल झाले. पोलिस नाईक अविनाश उत्तम पाटील यांनी दिलेल्या फिर्यादीवरून निंभोरा पोलिस ठाण्यात गुन्हा दाखल झाला आहे.
पोलिसांनी घटनास्थळी येत पंचनामा केला. तर मारेकरी हाजराबाई तडवी यांना पोलिसांनी अटक केली. यानंतर त्यांना रावेर न्यायालयात हजर केले. न्यायालयाने त्यांना पोलिस कोठडी सुनावली. उपनिरीक्षक अभय ढाकणे व दीपाली पाटील, पोलिस नाईक अविनाश पाटील तपास करीत आहेत.
Discussion about this post