जळगाव: लाचखोरीच्या आणखी एक घटना जळगाव जिल्ह्यातून समोर आलीय. रावेर तालुक्यात शेतजमिनीच्या मोजणीसाठी घेतलेल्या लाचेच्या प्रकरणात भूमी अभिलेख अधिकाऱ्याला रंगेहाथ पकडण्यात आले आहे. तक्रारदाराने दिलेल्या माहितीनुसार, अधिकारी राजेंद्र रमेश कुलकर्णी (वय 48, भूकरमापक, भूमी अभिलेख कार्यालय, रावेर) यांनी मोजणी चिन्ह दाखवण्यासाठी 5500 रुपयांची मागणी केली होती.
तक्रारदाराची रावेर तालुक्यातील मस्कावद येथे सामाईक शेत जमिन आहे. या शेतजमिनीच्या मोजणीसाठी भूमी अभिलेख अधिकाऱ्याने लाच मागितली होती. तडजोडीनंतर ही रक्कम 4000 रुपये करण्यात आली. तक्रारदाराने याबाबत तात्काळ लाचलुचपत प्रतिबंधक विभागाला (ACB) कळवले.
पोलिसांनी नियोजनबद्ध सापळा रचून निंभोरा येथे 4 हजारांची लाच घेताना कुलकर्णी यास रंगेहाथ अटक केली आहे. ही कारवाई पोलीस उपअधीक्षक योगेश ठाकूर यांच्या मार्गदर्शनाखाली सहाय्यक फौजदार सुरेश पाटील, पोलीस काॅन्सटेबल राकेश दुसाने आणि पोलीस काॅन्सटेबल अमोल सूर्यवंशी यांनी केली. या प्रकरणी निंभोरा पोलीस ठाण्यात गुन्हा दाखल करण्यात आला आहे.
Discussion about this post