रावेर । एका ४३ वर्षीय व्यक्तीला हनी ट्रॅपमध्ये अडकवून त्याच्याकडे ११ लाखांची खंडणी मागणाऱ्या महिलेला रावेर पोलिसांनी बेड्या ठोकल्या आहेत.या घटनेने जिल्ह्यात खळबळ उडाली आहे.
रावेर तालुक्यातील एक इसम २०१८ मध्ये स्वतः च्या कारमध्ये जळगाव येथे जात असताना एका ४३ वर्षाच्या महिलेने गाडीत लिफ्ट मागितली. सोबत प्रवास केल्यामुळे त्यांची मैत्री झाली. त्या महिलेने त्याला घरी जेवणास बोलावले. तिने कोल्ड्रीक्समध्ये गुंगीचे औषध टाकून त्याला बेशुद्ध केले आणि त्याच्या सोबत शारीरिक संबंध केल्याचा बनाव केला. यानंतर तिने त्याचे व्हिडिओ चित्रण करून सदर इसमाच्या घरी व सोशल मीडियावर व्हायरल करण्याची धमकी दिली. त्यानंतर वारंवार त्याला धमकावत घरी बोलावून खंडणी मागू लागली.
२३ डिसेंबर २०२३ पासून ती महिला व तिचा मुलगा निर्मल पाटील (वय २१) या दोघांच्या खात्यात फोन पे द्वारे सुमारे ११ लाख रुपये टाकले होते. यामुळे त्या महिलेची मागणी वाढत गेली. २१ फेब्रुवारी २०२५ रोजी सदर महिलेने फिर्यादीने ५ कोटी रुपये घेतल्याचा लेखी करारनामा पावती करून घेतला. या महिलेची पैशांची मागणी वाढत गेल्यामुळे सदर इसम त्रस्त झाला होता. त्याने रावेर पोलीस ठाण्याचे पोलीस निरीक्षक डॉ. विशाल जयस्वाल यांना ही माहिती दिली.
बुधवारी दुपारी सव्वा तीन वाजेच्या सुमारास जयस्वाल यांनी सहाय्यक पोलीस निरीक्षक अंकुश जाधव, महिला पोलीस उपनिरीक्षक प्रिया वसावे, महिला पोलीस माधवी सोनवणे, पोलीस कॉन्स्टेबल महेश मोगरे, सुकेश तडवी, श्रीकांत चव्हाण यांचे पथक पाठवून या महिलेवर कारवाईचे निर्देश दिले. तिला रंगेहात पकडण्यासाठी सापळा रचला. रावेर बऱ्हाणपूर मार्गावरील एसएसबीटी मार्ट या दुकानाच्या मागील बाजूस सदर इसमास महिलेने एक लाख रुपये घेऊन बोलावले होते. यावेळी पोलिसांनी पैसे स्वीकारताना महिलेला रंगेहात पकडले. याबाबत दिलेल्या फिर्यादीवरून रावेर पोलीस ठाण्यात गुन्हा दाखल करण्यात आला आहे. पुढील तपास सहाय्यक पोलीस निरीक्षक अंकुश जाधव करीत आहेत.
Discussion about this post