मुंबई । महाराष्ट्र विधानसभा निवडणुकीसाठी मतदान झाल्यांनतर आता मतमोजणीसाठी अवघे काही तास राहिले असताना आता राजकीय वर्तुळात घडामोडींना वेग आला आहे. महाविकास आघाडी आणि महायुतीच्या बैठकांचे सत्र सुरू आहे.
दरम्यान, महायुतीसह महाविकास आघाडीने मतदानापूर्वी मुख्यमंत्रीपदाचा चेहरा स्पष्ट केला नाहीय. यातच जर महाविकास आघाडीला बहुमत मिळालं तर मुख्यमंत्री कोण होणार याबाबत काँग्रेसचे महाराष्ट्र प्रभारी रमेश चेन्नीथला यांनी वक्तव्य केलं आहे.
ज्या पक्षाला जास्त जागा मिळतील, त्याचा मुख्यमंत्री होणार का, महाविकास आघाडीचा मुख्यमंत्रीपदाबाबत काय फॉर्म्युला ठरला आहे, असा प्रश्न रमेश चेन्नीथला यांना विचारण्यात आला. यावर बोलताना, मुख्यमंत्रीपदावरून कोणताही वाद नाही, निकालानंतर महाविकास आघाडीतील प्रमुख नेते एकत्र बसून त्यावर निर्णय घेतील, असे रमेश चेन्नीथला यांनी स्पष्ट केले.
पत्रकारांशी बोलताना, लोकसभा निवडणुकीप्रमाणे विधानसभा निवडणुकीतही महाराष्ट्रातील जनता काँग्रेस व महाविकास आघाडीच्या पाठीशी भक्कमपणे उभी राहिली आहे. विधानसभा निवडणुकीत महाराष्ट्रातील जनतेचा कौल महाविकास आघाडीलाच मिळेल व स्पष्ट बहुमतासह काँग्रेस महाविकास आघाडी सरकार स्थापन करेल असा विश्वास काँग्रेसचे महाराष्ट्र प्रभारी रमेश चेन्नीथला यांनी व्यक्त केला आहे.
Discussion about this post