मुंबई । विधानसभा निवडणुकीवेळी पक्षाकडून तिकीट न मिळाल्यामुळे अनेक इच्छुकांनी बंडखोरी केली असून अशा बंडखोरांवर विविध पक्षाकडून कारवाया केल्या जात असून अशातच आता काँग्रेसनेही त्यांच्या बंडखोर उमेदवारांवर कठोर कारवाई केली आहे. बंडखोरांना ६ वर्षे पक्षातून निलंबित केले आहे.पुण्यातील आबा बागुल , कमल व्यवहारे आणि मनिष आनंद या बंडखोरांना निलंबित करण्यात आले आहे.
बंडखोरी करणाऱ्यांविरोधात काँग्रेसने कारवाई करण्यास सुरूवात केली आहे. मनीष आनंद, कमल व्यवहारे यांनी काँग्रेस सदस्यवताचा राजीनामा दिला. काँग्रेसमधून बंड केलेल्या अपक्ष उमेदवार आबा बागुल यांच्यावर काँग्रेसने कारवाई केली. आबा बागुल पर्वती मतदारसंघातून अपक्ष उमेदवार म्हणून निवडणूक लढवत आहेत. कमल व्यवहारे काँग्रेसचा राजीनामा देत कसबामधून निवडणूक लढवणार आहेत. तर मनीष आनंद हे सुद्धा काँग्रेसचा राजीनामा देत शिवाजीनगर मतदारसंघातून निवडणूक लढवत आहेत.
पुणे शहर काँग्रेसकडून प्रदेशाला प्रस्ताव पाठवण्यात आला. विधानसभा निवडणुकीत महाविकास आघाडीच्या विरोधात लढण्याचा निर्णय घेतलेल्या काँग्रेसच्या बंडखोरांवर ६ वर्षे निवडणूक बंदी घालण्याचा प्रस्ताव पाठवण्यात आला आहे. पुण्यातील कसबा, शिवाजीनगर आणि पर्वती विधानसभा मतदारसंघात काँग्रेसमधील उमेदवारांनी बंडखोरी केली होती.
बंडाची तलवार म्यान करून त्यांनी आघाडीच्या उमेदवारांना पाठिंबा जाहीर करावा, असे काँग्रेसने त्यांना सांगितलं होतं. तसे न केल्यास निलंबनाची कारवाई करण्याचा निर्णय शहर काँग्रेसने घेतला आहे.
