तामिळनाडूतील तिरुवल्लूर जिल्ह्यातील एका सी-फूड प्रक्रिया उद्योगात अमोनिया गॅसची गळती झाल्याने मोठी दुर्घटना घडली आहे. या दुर्घटनेत सात महिला कामगारांचा मृत्यू झाला असून ६७ जणांना विविध रुग्णालयांत उपचारासाठी दाखल करण्यात आले आहे. यापैकी काही महिलांची प्रकृती अत्यंत चिंताजनक असून अनेकजणी अतिदक्षता विभागात उपचार घेत आहेत.
ही घटना पेरियापलायम परिसरातील कनिगैपैर गावात असलेल्या सेंट पीटर्स अँड पॉल सी फूड्स एक्सपोर्ट्स कंपनीत घडली. काम सुरू असताना अचानक अमोनिया गॅसची गळती झाल्याने कारखान्यात एकच गोंधळ उडाला. गॅसचा प्रभाव झाल्यामुळे अनेक महिला कामगारांना श्वास घेण्यास त्रास, चक्कर येणे आणि उलट्यांचा त्रास सुरू झाला. काही कामगार घटनास्थळीच बेशुद्ध पडल्या, तर काहींचा उपचारादरम्यान मृत्यू झाला.
प्राथमिक तपासात कारखान्यातील एका मोठ्या व्हॉल्व्हमधून अमोनिया गॅस बाहेर पडल्याचा संशय व्यक्त करण्यात आला आहे. दुर्घटनेचे नेमके कारण शोधण्यासाठी तज्ज्ञांकडून तपास सुरू करण्यात आला असून फॉरेन्सिक आणि तांत्रिक पथके घटनास्थळी दाखल झाली आहेत.
या घटनेतील बहुतांश मृत आणि जखमी महिला उत्तर भारतातील विविध राज्यांतून रोजगारासाठी आलेल्या स्थलांतरित कामगार असल्याची माहिती समोर आली आहे. दुर्घटनेनंतर रुग्णालयाबाहेर नातेवाईकांनी मोठी गर्दी केली असून परिसरात हळहळ व्यक्त केली जात आहे.
दरम्यान, तामिळनाडू सरकारने या घटनेची गंभीर दखल घेत उच्चस्तरीय चौकशी समिती नेमली आहे. समितीला दुर्घटनेमागील कारणांचा सखोल तपास करून तातडीने अहवाल सादर करण्याचे निर्देश देण्यात आले आहेत. पोलिसांनी कंपनीविरोधात गुन्हा दाखल केला असून कारखान्याच्या मालकाला अटक करण्यात आली आहे. तसेच काही अधिकाऱ्यांचीही चौकशी सुरू असल्याची माहिती समोर आली आहे.
Discussion about this post