बिहारमध्ये गंगा नदीत नाव उलटून १३ मुलांचा मृत्यू; श्राद्धाच्या कार्यक्रमाला जाताना काळाचा घाला

बिहारच्या वैशाली जिल्ह्यातील राघोपुर येथे गंगा नदीत नाव उलटून झालेल्या भीषण दुर्घटनेत १३ मुलांचा बुडून मृत्यू झाला आहे. मंगळवारी रात्री घडलेल्या या घटनेमुळे संपूर्ण परिसरात शोककळा पसरली आहे. या दुर्घटनेत काही जण बेपत्ता असल्याची माहिती असून, बुधवारी सकाळी राष्ट्रीय आपत्ती प्रतिसाद दलाच्या (एनडीआरएफ) पथकाने पुन्हा शोधमोहीम सुरू केली. मृतांमध्ये बहुतांश मुलांचे वय १५ वर्षांच्या आसपास असल्याचे सांगण्यात येत आहे.

मिळालेल्या माहितीनुसार, वैशाली जिल्ह्यातील रामपूर श्यामचंद पंचायत अंतर्गत भगतान टोला परिसरात श्राद्धाचा कार्यक्रम आयोजित करण्यात आला होता. या कार्यक्रमात सहभागी होण्यासाठी सुमारे २० ते २५ जण एका छोट्या नावेतून नदीपलीकडे जात होते. नावेत मुले आणि ग्रामस्थ होते. मात्र, नदीच्या प्रवाहातून जात असताना अचानक नाव उलटली आणि त्यातील सर्वजण पाण्यात पडले.ही नाव सरकारी असल्याची माहिती समोर आली आहे. मात्र, नाव नेमकी कशामुळे उलटली, याबाबत अद्याप स्पष्टता नाही. या दुर्घटनेमुळे कार्यक्रमासाठी निघालेल्या कुटुंबांवर दुःखाचा डोंगर कोसळला आहे.

१३ मुलांचा मृत्यू; तिघांना रुग्णालयात हलवले

नाव बुडाल्याची माहिती मिळताच परिसरातील ग्रामस्थ आणि स्थानिक नागरिकांनी घटनास्थळी धाव घेतली. तासाभराच्या अथक प्रयत्नांनंतर पाण्यात बुडालेल्या काही जणांना बाहेर काढण्यात आले. त्यानंतर १७ मुलांना राघोपुर फतेहपूर येथील प्राथमिक आरोग्य केंद्रात उपचारासाठी दाखल करण्यात आले.डॉक्टरांनी तपासणी केल्यानंतर १३ मुलांना मृत घोषित केले. गंभीर अवस्थेतील तीन मुलांना पुढील उपचारांसाठी पाटणा येथील पीएमसीएच रुग्णालयात पाठवण्यात आले, तर एका मुलाची प्रकृती ठीक असल्याचे सांगण्यात आले आहे.

मृतांमध्ये १५ वर्षांच्या आसपासच्या मुलांचा समावेश

या दुर्घटनेत जीव गमावलेल्या मुलांमध्ये मीरा कुमारी, निशु कुमारी, अनिषा कुमारी, सुनीता कुमारी, आर्यन कुमार, मोहन कुमार, अमृता कुमारी, अंकिता कुमारी, पिंकी कुमारी, नमन कुमार, सिकी कुमारी, भोनू कुमारी आणि सोनम कुमारी यांचा समावेश आहे.एकाच गावातील मुलांचा या दुर्घटनेत मृत्यू झाल्याने गावावर शोककळा पसरली आहे. अनेक कुटुंबांनी आपल्या मुलांना गमावल्याने परिसरात हळहळ व्यक्त होत आहे.

एनडीआरएफकडून शोधमोहीम सुरू

दुर्घटनेनंतर बेपत्ता असलेल्या व्यक्तींचा शोध घेण्यासाठी एनडीआरएफच्या पथकाने बुधवारी सकाळी पुन्हा शोधमोहीम सुरू केली. नदीतील प्रवाह आणि दुर्घटनेचे स्वरूप लक्षात घेता शोधकार्य सुरू ठेवण्यात आले आहे. दरम्यान, नाव उलटण्यामागील नेमके कारण आणि सुरक्षिततेच्या उपाययोजनांबाबत अधिक माहिती समोर येणे बाकी आहे.