यावल : तालुक्यातील दहिगाव येथे शेतीकाम करताना झालेल्या भीषण अपघातात २८ वर्षीय तरुणाचा दुर्दैवी मृत्यू झाला. रोटावेटरचे काम सुरू असताना ट्रॅक्टरच्या चाकाखाली सापडल्याने ही घटना घडली. विशेष म्हणजे, अवघ्या काही दिवसांवर त्याचा विवाह ठरलेला असल्याने परिसरात शोककळा पसरली आहे.
मृत तरुणाचे नाव योगेश यशवंत पाटील असे असून तो दहिगाव येथील रहिवासी होता. शनिवारी दुपारच्या सुमारास तो शेतात ट्रॅक्टरद्वारे रोटावेटरचे काम करत होता. काम सुरू असतानाच अचानक त्याचा तोल गेला आणि तो थेट ट्रॅक्टरच्या मोठ्या चाकाखाली सापडला. त्यानंतर रोटावेटरमध्ये अडकल्याने त्याचा जागीच मृत्यू झाला.
घटनेनंतर ट्रॅक्टर सुरू अवस्थेत पुढे जात शेजारील शेतात पोहोचला. परिसरातील एका तरुणाने हा प्रकार पाहताच धाव घेत ट्रॅक्टर बंद केला आणि तातडीने कुटुंबीयांना माहिती दिली. घटनेची माहिती मिळताच नातेवाईकांनी घटनास्थळी धाव घेतली.गंभीर जखमी अवस्थेत योगेशला यावल ग्रामीण रुग्णालयात दाखल करण्यात आले. मात्र डॉक्टरांनी तपासणीनंतर त्याला मृत घोषित केले. शवविच्छेदनाची प्रक्रिया पूर्ण करण्यात आली असून यावल पोलीस ठाण्यात अकस्मात मृत्यूची नोंद करण्यात आली आहे.
दरम्यान, योगेशचा विवाह येत्या १८ जून रोजी होणार होता. घरात लग्नाची तयारी सुरू असतानाच अचानक घडलेल्या या घटनेमुळे कुटुंबावर दुःखाचा डोंगर कोसळला आहे. गावातही हळहळ व्यक्त केली जात असून सर्वत्र शोकमय वातावरण आहे.या प्रकरणाचा पुढील तपास पोलीस करत असून शेतीकाम करताना सुरक्षेच्या उपाययोजनांचे महत्त्व पुन्हा एकदा अधोरेखित झाले आहे.
Discussion about this post