नवी दिल्ली : हरियाणा विधानसभा निवडणुकीवरून राजकारण तापले आहे. एकीकडे तिकीट न मिळाल्यामुळे भाजपमध्ये नाराज नेते बंडखोरीच्या मार्गावर आहेत. त्यामुळे भाजप डॅमेज कंट्रोलसाठी प्रयत्न करत आहे. अशातच आंतरराष्ट्रीय स्तरावरील कुस्तीपटू बजरंग पुनिया आणि विनेश फोगाट यांनी आज काँग्रेसमध्ये प्रवेश केला आहे. पक्षात प्रवेश करण्यापूर्वी दोन्ही खेळाडूंनी काँग्रेस अध्यक्ष मल्लिकार्जुन खर्गे यांची भेट घेतल्याची माहितीही समोर आली आहे.
विनेश फोगट यांनी पक्षात प्रवेश करताच काँग्रेस पक्षाचे आभार मानले. तर भाजपवर सडकून टीकाही केली. विनेश म्हणाली की, संकटाच्या काळात तुम्हाला तुमचा कोण आहे हे कळते.
जेव्हा आम्हाला रस्त्यावर ओढले जात होते तेव्हा भाजप वगळता सर्व पक्ष आमच्यासोबत होते. विशेषत: काँग्रेस पक्ष आमच्या पाठीशी उभा होता. कुस्तीमध्ये जी मेहनत घेतली, तीच मेहनत येथेही करू. आजपासून आम्ही एक नवीन इनिंग सुरू करत आहोत. अजूनही लढा सुरू आहे, असेही तिने यावेळी स्पष्ट केले.
तसेच बजरंग पुनिया यांनी पक्षात प्रवेश करताच काँग्रेसचे आभार मानले. “आम्ही भाजपकडे मदत मागितली होती, तरीही ते आम्हाला साथ देऊ शकले नाहीत, मात्र काँग्रेसने आम्हाला नेहमीच साथ दिली. विनेशच्या पराभवावर संपूर्ण देश रडत होता पण एक आयटी सेल जल्लोष करत होता, अशा शब्दांत बजरंग पुनियाने भाजपच्या आयटी सेलवर निशाणा साधला. काँग्रेस अध्यक्षांना भेटण्यापूर्वी दोघांनीही रेल्वेची नोकरी सोडली.
Discussion about this post