‘सेवा पखवडा’ व ‘सेवा संकल्प अभियानांतर्गत पर्यावरण संवर्धनाचा संदेश
सोलापूर : पंतप्रधान नरेंद्र मोदी यांच्या वाढदिवसानिमित्त देशभर राबविण्यात येत असलेल्या ‘सेवा पखवडा’ आणि ‘सेवा संकल्प अभियानांतर्गत सोलापूरमध्ये पर्यावरण संवर्धनाचा संदेश देणारा स्तुत्य उपक्रम राबविण्यात आला. सोलापूर इंडस्ट्रीज असोसिएशन आणि महाराष्ट्र कामगार विमा सोसायटी सेवा दवाखाना (ESIS), चिंचोळी एमआयडीसी यांच्या संयुक्त विद्यमाने मंगळवार, दि. १३ ऑक्टोबर २०२६ रोजी सोलापूर इंडस्ट्रीज असोसिएशनच्या नूतन इमारतीच्या आवारात वृक्षारोपण कार्यक्रम आयोजित करण्यात आला.
वाढते औद्योगिकीकरण, लोकसंख्येतील वाढ आणि हवामान बदलाच्या पार्श्वभूमीवर वृक्षारोपणाची गरज अधोरेखित करत या उपक्रमाचे आयोजन करण्यात आले. यावेळी सोलापूर इंडस्ट्रीज असोसिएशनचे खजिनदार सप्रेम कोठारी आणि महाराष्ट्र कामगार विमा सोसायटी सेवा दवाखाना, चिंचोळीचे वैद्यकीय अधिकारी डॉ. सुजित राठोड यांच्या हस्ते वड, पिंपळ, कडुलिंब आणि गुलमोहर यांसारख्या वृक्षांच्या रोपांची लागवड करण्यात आली.
यावेळी सोलापूर इंडस्ट्रीज असोसिएशनचे खजिनदार सप्रेम कोठारी म्हणाले, उद्योगांचा विकास करताना पर्यावरणाचा समतोल राखणे ही सामाजिक जबाबदारी आहे. केवळ वृक्षारोपण करून चालणार नाही, तर लावलेली झाडे जगविणेही तितकेच महत्त्वाचे आहे. सोलापूर इंडस्ट्रीज असोसिएशन यापुढेही महाराष्ट्र कामगार विमा सोसायटी सेवा दवाखान्याच्या सहकार्याने चिंचोळी एमआयडीसी परिसरात वृक्षारोपण आणि पर्यावरण जनजागृतीचे उपक्रम सातत्याने राबविणार आहे.
महाराष्ट्र कामगार विमा सोसायटी सेवा दवाखाना, चिंचोळीचे वैद्यकीय अधिकारी डॉ. सुजित राठोड यांनी वृक्ष आणि मानवी आरोग्य यांचा थेट संबंध असल्याचे सांगितले. वृक्षांमुळे हवेची गुणवत्ता सुधारण्यास, तापमान नियंत्रित ठेवण्यास आणि निरोगी पर्यावरण निर्माण करण्यास मदत होते. कामगारांच्या आरोग्यासाठी कार्यरत असलेल्या संस्थेच्या वतीने या अभियानात सहभागी होणे हे आपले कर्तव्य असल्याचे त्यांनी नमूद केले.
या उपक्रमातून ‘एक झाड, एक श्वास’ आणि ‘झाडे लावा, झाडे जगवा’ या संदेशांचा प्रसार करण्यात आला. लागवड केलेल्या रोपांच्या संवर्धनाची जबाबदारी असोसिएशनने स्वीकारली असून, त्यांना नियमित पाणी देणे आणि आवश्यक निगा राखण्यासाठी नियोजन करण्यात आले आहे.
याप्रसंगी ESISचे प्रयोगशाळा तंत्रज्ञ जितेंद्र कांबळे, गायत्री सूत्रवे, प्रियांका गायकवाड, परमेश्वर जाधव, दिव्या चौरे, ज्ञानेश्वर साठे, सुरेश हितनल्ली आणि शुद्धोधन गायकवाड यांच्यासह सोलापूर इंडस्ट्रीज असोसिएशनचे खजिनदार सप्रेम कोठारी, ESIS दवाखान्याचे कर्मचारी आणि कामगार मोठ्या संख्येने उपस्थित होते.
Discussion about this post