बीड । राज्याच्या राजकारणातून एक मोठी बातमी समोर येत आहे. राष्ट्रवादी काँग्रेस शरदचंद्र पवार पक्षाचे खासदार बजरंग सोनवणे यांच्या कारला भीषण अपघात झाल्याची माहिती मिळत आहे. बीडहून केजकडे जात असताना मस्साजोग बस स्थानकाजवळ एका दुचाकीने त्यांच्या कारला पाठीमागून जोरदार धडक दिली. या अपघातात खासदारांच्या कारचे मोठ्या प्रमाणावर नुकसान झाले असून दुचाकीस्वार जखमी झाला आहे.
नेमकी घटना काय?
मिळालेल्या माहितीनुसार, खासदार बजरंग सोनवणे हे आपल्या ताफ्यासह बीडहून केजच्या दिशेने प्रवास करत होते. त्यांचा ताफा मस्साजोग येथील बस स्थानकावर थांबलेला असताना ही दुर्घटना घडली. एका वेगाने येणाऱ्या दुचाकीने खासदारांच्या कारला पाठीमागून धडक दिली. ही धडक इतकी भीषण होती की, कारच्या मागच्या बाजूच्या काचा फुटल्या असून गाडीचे मोठे नुकसान झाले आहे.
अपघाताच्या वेळी खासदार बजरंग सोनवणे कारमध्येच होते, मात्र सुदैवाने त्यांना कोणतीही दुखापत झाली नाही. दुचाकीस्वार या धडकेत जखमी झाला असून, त्याला उपचारासाठी तातडीने जवळच्या रुग्णालयात दाखल करण्यात आले आहे. अपघातानंतर परिसरात काही काळ तणावाचे वातावरण निर्माण झाले होते आणि बघ्यांची मोठी गर्दी जमली होती.
Discussion about this post