मागील काही काळात रेल्वेला होणाऱ्या अपघाताचे प्रमाण वाढताना दिसत असून अशातच तामिळनाडूमध्ये म्हैसूर येथून दरभंगाच्या दिशेने जाणाऱ्या बागमती एक्स्प्रेसने ट्रॅकवर उभ्या असलेल्या ट्रेनला जोरदार धडक दिली. या अपघातात एक्स्प्रेसचे अनेक डबे रुळांवरून खाली घसले.या अुघातामध्ये सुदैवाने कोणतीही जीवितहानी झालेली नसली तरी 19 प्रवासी जखमी झाले आहेत. त्यांना उपचारांसाठी नजीकच्या रुग्णालयात दाखल करण्यात आलं आहे.
मिळालेल्या माहितीनुसार, 11 ऑक्टोबर रोजी रात्री साडेआठच्या सुमारास तिरुवल्लूर जिल्ह्यातील पोनेरी स्टेशन ओलांडल्यानंतर म्हैसूर दिब्रुगड दरभंगा एक्सप्रेसला पुढे जाण्यासाठी हिरवा सिग्नल देण्यात आला.पण “कावरपेट्टाई स्थानकात प्रवेश करत असताना, ट्रेनच्या कर्मचाऱ्यांना जोरदार धक्का बसला आणि दिलेल्या सिग्नलनुसार मेन लाइनमध्ये जाण्याऐवजी 75 किमी प्रतितास वेगाने धावणारी ही एक्स्प्रेस ‘लूपलाइन’ मध्ये गेली आणि तिथे उभ्या असलेल्या मालगाडीला धडकली. ही ट्रेन म्हैसूर येथून पेरम्बूरमार्गे बिहारमधील दरभंगाला जात होती. रात्री एक्सप्रेसने मालगाडीला धडक दिल्यानंतर 13 डबे रुळावरुन घसरले, तर काही डब्यांनी पेट घेतला.
या अपघाताची बातमी समजताच रेल्वेच्या अधिकाऱ्यांनी तसेच बचाव पथकातील कर्मचाऱ्यांनी तातडीने घटनास्थळी धाव घेतली आणि बचाव कार्य वेगाने सुरू केले. अपघात स्थळी तातडीने रुग्णवाहिका आणि एनडीआरएफ तुकड्याही पाठवण्यात आल्या. या अपघातात आत्तापर्यंत 19 प्रवासी जखमी झाले असून त्यांना उपचारांसाठी रुग्णालयात दाखल करण्यात आले. सुदैवाने कोणतीही जीवितहानी झालेली नाही.
