चेन्नई: तामिळनाडूच्या राजकारणात अत्यंत मोठी आणि खळबळजनक घडामोड समोर आली आहे. नव्याने सत्तेत आलेले मुख्यमंत्री जोसेफ विजय (थलापती विजय) यांचे सरकार राज्यात फार काळ टिकणार नाही, ते कधीही कोसळू शकते, असा दावा द्रमुक (DMK) प्रमुख आणि माजी मुख्यमंत्री एम. के. स्टॅलिन यांनी केला आहे. यासोबतच त्यांनी आपल्या पक्षाच्या कार्यकर्त्यांना आणि पदाधिकाऱ्यांना राज्यात कोणत्याही क्षणी निवडणुका लागू शकतात, त्यामुळे आत्तापासूनच निवडणुकीच्या तयारीला लागण्याचे आदेश दिले आहेत.
‘एनडीटीव्ही’ने दिलेल्या वृत्तानुसार, माजी मुख्यमंत्री एम. के. स्टॅलिन यांनी आपल्या पक्षाच्या जिल्हा सचिवांची एक महत्त्वाची बैठक घेतली. या बैठकीत त्यांनी आगामी पोटनिवडणुका आणि मध्यवधी निवडणुकांसाठी सज्ज राहण्याचे आदेश दिले. कार्यकर्त्यांना संबोधित करताना स्टॅलिन म्हणाले:
तामिळनाडूतील सध्याचे सरकार अत्यंत कमकुवत पायावर उभे आहे आणि ते कधीही कोसळू शकते. आपला हा पराभव तात्पुरता आहे. २०२९ च्या लोकसभा निवडणुकांसोबतच तामिळनाडूमध्ये पुन्हा विधानसभा निवडणुका होण्याची दाट शक्यता आहे. आपण पुन्हा पूर्ण ताकदीने मैदानात उतरू, पराभव भरून काढू आणि पुन्हा एकदा जिंकून सत्तेत येऊ.”
थलापती विजय यांच्या ‘तमिळगा वेत्री कळघम’ (TVK) या पक्षावर घणाघाती टीका करताना स्टॅलिन म्हणाले की, हा पक्ष सर्वसामान्यांपर्यंत पोहोचलेला नाही. गावखेड्यात किंवा जमिनीवर या पक्षाने कोणतेही ठोस काम केलेले नाही. केवळ सोशल मीडियाचा वापर करून आणि त्यावर प्रभावित होऊन हा पक्ष निवडणुकीत सत्तेत आला आहे, अशी टीका त्यांनी केली. यापूर्वी द्रमुकच्या (DMK) एका आमदारानेही “विजय यांचे सरकार अवघ्या ६ महिन्यांत कोसळेल,” असा दावा केला होता.
सरकार कोसळण्याचे राजकीय गणित काय?
रिपोर्टनुसार, तामिळनाडूच्या सध्याच्या राजकीय समीकरणांमध्ये मोठी अस्थिरता आहे. विजय यांच्या सरकारला सध्या बाहेरून पाठिंबा देणाऱ्या पक्षांवर हे सरकार अवलंबून आहे.
Discussion about this post