पिंपरी-चिंचवड: पुण्यातील शैक्षणिक वर्तुळातून एक धक्कादायक घटना समोर आली आहे. बोटॅनिकल सर्व्हे ऑफ इंडियामधील एका ३० वर्षीय पीएचडी विद्यार्थिनीने आपल्या गाईडच्या मानसिक आणि अनैतिक त्रासाला कंटाळून गळफास घेत आपली जीवनयात्रा संपवली. याप्रकरणी भोसरी एमआयडीसी पोलिसांनी सहाय्यक संचालक डॉ. ए. बिन्नियमिन याला अटक केली आहे.
नेमकी घटना काय?
संबंधित तरुणी शाहूनगर परिसरात वास्तव्यास होती. ती बॉटनी विषयात बोटॅनिकल सर्व्हे ऑफ इंडिया येथे पीएचडीचे संशोधन करत होती. आरोपी डॉ. ए. बिन्नियमिन हा तिचा गाईड (मार्गदर्शक) म्हणून कार्यरत होता. शनिवारी, ११ एप्रिल रोजी तरुणीने राहत्या घरी गळफास घेऊन आत्महत्या केली. या घटनेमुळे परिसरात एकच खळबळ उडाली आहे.
सुसाईड नोटमध्ये धक्कादायक खुलासे
आत्महत्या करण्यापूर्वी तरुणीने एक चिठ्ठी लिहून ठेवली आहे. या सुसाईड नोटमध्ये तिने गाईड बिन्नियमिन याच्यावर गंभीर आरोप केले आहेत. ऑगस्ट २०२५ पासून बिन्नियमिन हा सातत्याने अनैतिक मागणी, गैरवर्तन आणि मानसिक त्रास देत असल्याचे तिने चिठ्ठीत नमूद केले आहे. याच त्रासामुळे आलेल्या नैराश्यातून तिने हे टोकाचे पाऊल उचलले.
माफीनामा लिहूनही दिला, पण मानसिक धक्का कायम
तपासातून समोर आलेल्या माहितीनुसार, आत्महत्या करण्याच्या दोन दिवस आधी बिन्नियमिन याने एका स्टॅम्प पेपरवर “पुन्हा असा प्रकार करणार नाही, माझी चूक झाली” असा माफीनामा लिहून दिला होता. मात्र, एवढा काळ सहन केलेल्या मानसिक धक्क्यातून संबंधित तरुणी सावरू शकली नाही आणि अखेर तिने आयुष्य संपवण्याचा निर्णय घेतला.
आरोपीला १५ एप्रिलपर्यंत पोलीस कोठडी
तरुणीच्या वडिलांनी दिलेल्या फिर्यादीवरून भोसरी एमआयडीसी पोलीस ठाण्यात गुन्हा दाखल करण्यात आला आहे. पोलिसांनी तातडीने कारवाई करत डॉ. ए. बिन्नियमिन याला अटक केली. न्यायालयाने आरोपीला बुधवार, १५ एप्रिलपर्यंत पोलीस कोठडी सुनावली आहे. पोलीस निरीक्षक भोजराज मिसाळ या प्रकरणाचा अधिक तपास करत आहेत.
Discussion about this post