बेरोजगार तरुणांना रोजगाराची संधी; २ एप्रिल रोजी पाचोरा येथे रोजगार मेळाव्याचे आयोजन

जळगाव । जिल्हा कौशल्य विकास, रोजगार व उद्योजकता मार्गदर्शन केंद्र, जळगाव आणि शासकीय औद्योगिक प्रशिक्षण संस्था (आयटीआय) पाचोरा यांच्या संयुक्त विद्यमाने उमेदवारांसाठी पंडित दीनदयाल उपाध्याय रोजगार व समुपदेशन मेळावा दि. २ एप्रिल २०२६ रोजी सकाळी १०.०० वाजता आयोजित करण्यात आला आहे.

हा मेळावा शासकीय औद्योगिक प्रशिक्षण संस्था, सारोळा रोड, पाचोरा, जि. जळगाव येथे आयोजित करण्यात येणार आहे. या मेळाव्यात स्पेक्ट्रम इलेक्ट्रिकल, युवा शक्ती फाउंडेशन आणि भार्दवाज नेटवर्क सोल्यूशन प्रा. लि. यांसारख्या नामांकित उद्योगांचे प्रतिनिधी उपस्थित राहून उमेदवारांची मुलाखत घेणार आहेत.

या मेळाव्यासाठी १० वी, १२ वी, पदवीधर (बी.कॉम., एम.कॉम. आदी) पात्रता असलेले इच्छुक उमेदवार सहभागी होऊ शकतात. इच्छुक उमेदवारांनी विभागाच्या https://rojgar.mahaswayam.gov.in या संकेतस्थळावर उपलब्ध असलेल्या रिक्त पदांसाठी आपल्या युजर आयडी व पासवर्डने लॉग इन करून अर्ज (Apply) करावा. तसेच ज्या उमेदवारांनी अद्याप नोंदणी केलेली नाही त्यांनीही सर्व शैक्षणिक कागदपत्रांसह मेळाव्याच्या दिवशी मुलाखतीसाठी उपस्थित राहावे.

यासंदर्भात अधिक माहिती अथवा अडचण असल्यास उमेदवारांनी कार्यालयीन कामकाजाच्या दिवशी सकाळी ९.४५ ते सायं. ६.१५ या वेळेत जिल्हा कौशल्य विकास, रोजगार व उद्योजकता मार्गदर्शन केंद्र, शासकीय तांत्रिक विद्यालय परिसर, जी.एस. ग्राउंड जवळ, जळगाव येथे प्रत्यक्ष भेट द्यावी किंवा दूरध्वनी क्रमांक ०२५७-२९५९७९० वर संपर्क साधावा, असे आवाहन संदीप ज्ञा. गायकवाड, सहायक आयुक्त, जिल्हा कौशल्य विकास, रोजगार व उद्योजकता मार्गदर्शन केंद्र, जळगाव यांनी केले आहे.