अभियांत्रिकी पदवी पूर्ण करून सरकारी नोकरीच्या शोधात असलेल्या उमेदवारांसाठी मोठी संधी आहे. NTPC लिमिटेडने उपव्यवस्थापक (Deputy Manager) पदासाठी भरती जाहीर केली आहे. या भरतीद्वारे इलेक्ट्रिकल, मेकॅनिकल आणि कंट्रोल अँड इन्स्ट्रुमेंटेशन विभागातील एकूण १३५ पदे भरली जाणार आहेत. अर्ज प्रक्रिया १२ ऑगस्टपासून सुरू झाली असून, इच्छुक उमेदवारांना २६ ऑगस्ट २०२६ पर्यंत ऑनलाइन अर्ज करता येणार आहे.
१३५ पदांची भरती
NTPCच्या या भरतीमध्ये उपव्यवस्थापक (मेकॅनिकल) पदासाठी ५५, उपव्यवस्थापक (इलेक्ट्रिकल) पदासाठी ४० आणि उपव्यवस्थापक (कंट्रोल अँड इन्स्ट्रुमेंटेशन) पदासाठी ४० जागा आहेत.
या पदांसाठी उमेदवारांकडे संबंधित अभियांत्रिकी शाखेतील पूर्णवेळ BE किंवा BTech पदवी असणे आवश्यक आहे. त्यासोबत संबंधित क्षेत्रातील कामाचा अनुभवही आवश्यक आहे.
कोणत्या शाखेतील उमेदवार पात्र?
इलेक्ट्रिकल : इलेक्ट्रिकल इंजिनिअरिंग किंवा इलेक्ट्रिकल अँड इलेक्ट्रॉनिक्स इंजिनिअरिंग.
मेकॅनिकल : मेकॅनिकल, प्रोडक्शन, थर्मल इंजिनिअरिंग किंवा संबंधित शाखा.
कंट्रोल अँड इन्स्ट्रुमेंटेशन : इन्स्ट्रुमेंटेशन, कंट्रोल अँड इन्स्ट्रुमेंटेशन, इलेक्ट्रॉनिक्स अँड इन्स्ट्रुमेंटेशन किंवा इलेक्ट्रॉनिक्स अँड कम्युनिकेशन इंजिनिअरिंग.
पगार २ लाखांपर्यंत
NTPCमधील उपव्यवस्थापक पद E4 ग्रेडमध्ये असून, निवड झालेल्या उमेदवारांना ₹७०,००० ते ₹२ लाखांपर्यंत IDA वेतनश्रेणी मिळणार आहे. याशिवाय कंपनीच्या नियमानुसार महागाई भत्ता, विविध भत्ते, वैद्यकीय सुविधा आणि इतर लाभ मिळतील.
निवड प्रक्रिया कशी?
उमेदवारांच्या अर्जांची पात्रता आणि अनुभवाच्या आधारे छाननी केली जाईल. पात्र उमेदवारांना मुलाखतीसाठी बोलावले जाईल. त्यानंतर कागदपत्र पडताळणी करून अंतिम निवड केली जाणार आहे.
अर्ज कसा कराल?
उमेदवारांनी NTPCच्या अधिकृत वेबसाइटवरील Career विभागात जाऊन Deputy Manager Recruitment 2026 ची लिंक उघडावी. त्यानंतर नोंदणी करून वैयक्तिक माहिती, शैक्षणिक पात्रता आणि कामाचा अनुभव भरावा. आवश्यक कागदपत्रे, फोटो व स्वाक्षरी अपलोड करून ऑनलाइन शुल्क भरल्यानंतर अर्ज सबमिट करावा.
Discussion about this post